(يابوي) تذكر كل شي كان واذكر يوم جابر حيّ (قصيده:مكتوبه رائعه)

يابوي ليه تبكي كل ما شفتك وعينك لي=تخاف أموت يابوي وقبل الموت تبكيني
كفى يابوي لا تبكي وأنا موجود معك وحي=أجل بعد الرحيل وشلون في قبري توطيني
يابوي لو تموت الناس ماتسوى دموعك ذي=وأنا يابوي ميت قبل أموت وأنت محيني
قسم بالله يابوي لجل عينك شربت الغي=جرعت الهم والحرمان وبحر الويل يسقيني
تحملت السنين اللي طوتني في عذابي طي=وصار الجمر بكفوفي وتحت أقدام رجليني
يابوي ما على عمري حسافه ولا بقى بي شي=ولكن بطلبك يابوي تكفى لا تخليني
يابوي ما أبي غيرك يغسل جثتي بالمي=وتكفى قبل ما أتكفن يابوي فك لي عيني
بأمر الله يمكن ألمحك وأرحل بعيني ضي=وأودع وجهك الطاهر مع دنياي وسنيني
وخل الناس تحملني وترفع راسي ورجلي=وتاخذني على قبري وتكسب أجرها فيني
وإذا جيت القبر يابوي نزلني شوي شوي=ووجهني لبيت الله وقبلة المصليني
وإذا تقدر أبي صورتك أمانه حطها في يدي=لعل الله يشفع لي إذا صورتك في يديني
وحط الطين وإدفني وعز اللي يعزي في=ثلاث أيام يابوي يجونك المعزيني
ورابع يوم يابوي تذكر ضحكتي وعيني=تذكر ويش كنت أقول يوم انك تناديني
تذكر يوم كنت أنام في ظل النخل والفي=تجي يمي تصب الماء على وجهي وتصحيني
تذكر جرة الموال وصوت في حباله تي=تذكر يوم أغني لك قصيدي وأنت توحيني
تذكر ضحكتك لا قلت لك يابوي عشقي هي=تذكر كم قصيده خافيه مابينك وبيني
تذكر كل شي كان وأذكر يوم جابر حي=ولكن أسألك بالله يابوي لا تبكيني