مثلت في بيت من الشعر بانيه،،،،،،

مثلت في بيتٍ من الشعر بانيه = ومضارب الأمثال تصحِ النيامي
من قارب المرضى بالأمراض تعديه = ومن حل في دار المهيم يهامي
ومن جالس أهل السوء بالسوء ترميه = لوطار بين السماء والغمامي
والناس حتى المنسدح ماتخليه = لوانه ابكم مايعرف الكلامي
يستنطقونه لين ينطق بمافيه = وإلى نطق قالو عليه السلامي
ولابد يسمع قولتٍ فيه ما فيه = لوكان له في كل مجلس محامي
ولو هو شجاع بينات مواريه = ولو هوكريماً من سلالة كرامي
أحد ثلاث أشياء يحطونها فيه = ثلاث أعرف حسابهن بالتمامي
الاوله كان إن فعله مهقويه = وشافوه يحكي ما يخاف الملامي
قالو كذب ماكل هاذا مسويه = لوهو مشهلهم براس السنامي
والثانية إلى صار به ما مكفيه = وشافوه مقفي عن شرور الأنامي
قالو نفخه الكبر وبليس مغويه = وهذه سوات العفن دائم دوامي
والثالثة إلى شافو الله مغنيه = عزو مقامه لــو ماله مقامي
ولو انه أبخل منه بالناس مافيه = ويحسدهم الماء في قطوع المضامي
أمراً من الله لازم الناس تغليه = لو مالهم في كثر ماله مرامي
وانا ماحسده شيئ والله معطيه = الله عطاء الجنه وحسن الختامي
ماهو حلال قادر الله يفنيه = في حرف كون يكون كله عدامي
لكن المصيبه بعضهم ويش يطغيه = وهو يدري أن المال يذهب حطامي
يمسي غني ما يحسب الفقر يأتيه = ويصبح فقير الحال هزل العظامي
لومي على اللي أليا طمع في عوانيه = مايطمع إلا في حقوق الكرامي
والأ الردي لوعدو الناس مافيه = هذا حصاده في نهار الصرامي
يزعل ولا يرضى ولاحدًبمرضيه = وراه يهفى حقوقهم من شمامي
ولايستغيب الرجل من عند قافيه = ألاء مساكين الرجال الهلامي
إليا صار ما يقدر بفعله يساويه = يسباه با لغرات مثل الحرامي
لا مسوياً مثله ولاهو معافيه = ما غير أكل عرضه قليل الرحامي
يعيبه اللي نصف عيبه يغطيه = ولو ينكشف كله جرادً تهامي
الناس كا لوسواس في قلب راعيه = إليا عرضو لك ما تذوق المنامي
قولو معي يالله يامجيب داعيه = إنك لتستر من عيال الحرامي