مرثية الماضي وموعظة الحاضر

يوم أنقضى من الليل ليل وبقى ليل=عيني جفاها نومها عقب مانمت

ماستانست للنوم والكحل والِميل=وفكرت بالماضي وحنيت وأرزمت

فللت راسي بالهواجيس تفليل=مع صوت وانغام الهواجس تناغمت

بالصوت والصوره مشاهد وتمثيل=وعضيت في بصمة ابهامي وبهّمت

وابحرت بالتفكير بالحيل بالحيل=وسبحت بين أمواج ببحورها عمت

اطير بين الأرض والجدي وسهيل=بين الثريا والقمر بالسماء حمت

بين الرجا والخوف والعدل والميل=سلمت واستسلمت للقدر واسلمت

الليل كله يشغلنّي شواغيل=مثل المنجّم لاسرى النجم نجمت

أصخرك وأذللك يالشعر تذليل=يوم انحنيت وفوق صدري تحطمت

يرتاح بالي يوم ادللك تدليل=كنك خرز بنظام سبحه تنظمت

أفك بيبانك واقفلك تقفيل=مثل الجواهر فوق بعضك تراكمت

شط المحيط الهادي اصبح زلازيل=عقب الصفا جوك تغير وغيمت

جاك الرعد والبرق والريح والسيل=ياذا المحيط اللي بموجك تلاطمت

واصبحت وانا أشد واحط واشيل=يالعين جاء دور الكلام وتكلمت

حان الكلام وقلت من عرض ماقيل=عظمة لساني ترجماني وترجمت

يالعين وين مزينين المنازيل =شدّوا وانا بمخيم الخوف خيمت

جينا المنازل عقبهم والمداهيل =مريت بالدار وعلى الدار سلمت

وناديت واستهبلت مثل المهابيل=وتركت ذول ويم الأقصين درهمت

يادار وين النزل وين التعاليل=متغيره ماهي على مثلما رمت

كانوا هنا ومرحّل النزل ترحيل =وضاع الكلام وضاق صدري وتمتمت

هذا محل بيوتهم كنها قبيل=وهذي مواقد نارهم ماتوهمت

ضيّانهم بالليل مثل القناديل=تكسر ظلامك يااسود الليل لاظلمت

وهذي مهاجع لابسات الخلاخيل =اللهُ أكبر يالصفا ليه مادمت

يوم النساء مثل الاصايل من الخيل=آيه من الأخلاق والعقل والسمت

وذا دارنا وديران جيرانا ذيل=صارت خلا ورسومها رامته رمت

وهذاك ملعبنا بظل السياييل=وهناك نمت وبالسعادة تحلمت

نسرح ونمرح طبع الاطفال جهّيل=لو جاء عدوي وابتسم لي تبسمت

كان الزمان اللي مضى حلو وحليل=لنّي ذكرت اللي مضى بالخلا همت

ليت الدهر خلاك يامقدم الحيل =الله كم حييت واسقيت وأطعمت

يامعطر الرسلان بالبن والهيل=وان كان ماجت لك على الكيف تممت

والصبح تكبير وتسبّح وتهليل=وقمت الصلاة وثم حجيت واحرمت

نطلب لك اللي نزل الروح جبريل=يالله عساك بخاتمت خير ختمت

يالموت غيبت النساء والرجاجيل=فرقه عشاك وبالبقيه تيدمت

ماباقي إلا القبر بين المناصيل=من واسع الرحمه عليهم ترحمت

سكان وادي ويل راحوا على ويل=ومااسعدك ياللي بالنعايم تنعمت

يادار بعد الجيل الاول طلع جيل=ياجيل في سم الحداثه تسممت

ان كان ماتندم على موفي الكيل=قلي عليك الله على من تندمت

دنيا الزوال اللي على ظهرها زيل=لاتحسبنك في مقام الهناء قمت

لكن استمع للشرح جمله وتفصيل=أحسب حسابك وانتبه لو تكرمت

قدام لانتعبك بالشرح ونطيل =اسمع كلامي واعتبر والزم الصمت

واحسب حسابك بالليال المقابيل=لاجاء عميلك قول حاضر تولمت

لا دقت الساعه تجيك المراسيل =ممداك لاصليت فرضك ولا صمت

وضاع الطبيب ولا تفيد التحاليل=ساعه وترحل قبلها ويش قدمت

لو تطلب التمهيل مافيه تمهيل=ولا رحت ديوان المظالم تظلمت

واهلك ومالك بينك وبينهم حيل=وابنك تيتم وانت قبله تيتمت

الله يسهّل ساعة العسر تسهيل=ويالله عساك من الغنايم تغنمت

وان كان سيل العبد وان كان ماسيل=عدّيت كل اللي فعلته وعلمت

لاتعتذر يامعقد الذيل بالذيل=ياللي تنمنم بالقفا ليه نمنمت

حملك ثقيل وقوم بالحمل ياشعيل=ابرك على الله واحمد الله ليا قمت

يمكن من الباطل فعلت الافاعيل=وانا بريه ذمتي ماتذممت

لابد يوم تزل الاقدام وتعيل=ولابد ماطقيت راسك وعرمت

طاوعت نفسك ياقليل المحاصيل=يالعبد ياليتك بنفسك تحكمت

أفنيت عمرك بالشقا والغرابيل=ومن كثر صكات الدهر ماتعلمت

عذر المقصر قلة العزم والحيل=وقصّرت حتى شاب راسك وهرمت

يالعبد توب وقبل الارض تقبيل=ولاتلوم غيرك لوم نفسك اليا لمت

الله يكملنا بالايمان تكميل=ويلطف بنفسي كان في حقها أجرمت

يامفضل المسلم بالإسلام تفضيل=وياعالماً مااخفيت بالصدر وأبرمت

وختمّت بسم الله وبآيه وترتيل=وبالسمع والطاعه تطوعت وأقسمت