ليلة تمصع مشاعري

ياحيّا الله اللي داخلين وبيعلقون..وياحيا الله اللي داخلين بيقروون بس

من دون مقدمات ماصله..بس قد خطر في بالكم في يوم انكم بتغيرون اهلكم..وان اهلكم مايفهمونكم..الخ من هالحكي المؤثر( وش تبي ذي)


انا بقول لكم قصتي.. اهلي من النوع اللي يحبون العييايرّ (جمع عياره)

ومايصدقون انك تغلط الا ويلزقونها فيك لين تكره نفسك واليوم اللي

انولدت فيه..وانا مااقدروا يمسكون علي شي صامده كالطعس اقصد

كالجبل..بس صار لي مالا يحمد عقباه (ياويلي على الفصحى)

انا ياطويلين الاعمار اليوم طلعت من الاختبار وانا مستانسه مجاوبه

وبتشقق من الفرح..وجيت لاهلي طايره من الفرح اللي يشوفني وانا

اركض انا وعبايتي يقول وش هال الخفاش اللي طالع بالنهار...المهم

جيت والا االعائله المالكه مسوين اجتماع يناقشون ويحشون

ويتهاوشون..طبعا سالوني عن اختباري انا من وناستي ودي اقول

إختباري وودي اقول امتحاني ,, ضيعت وقلت امتخاري حلو !!

انا قلتها وسكت..وانا ادعي وابتهل وخطر اترّوح علشان

مايسمعوني ..بس على مين تلعبينها طبعا انطلقت اول شراره وهي

ضحكة الوالد الله يحفظه وكانت ضحكه مجلجله وتسنه بهالضحكه يقول

شفتوا هالصتيمه

قاموا طقم الاقلام (اخواني) اللي صافين جنبه وقعدوا يكهكون..وبدوا

مسلسلهم الماصل..قال واحد لي ماشاء الله ماينخاف عليتس حليتي

في امتخارتس..وكهكه الثاني وقال عسى خلصتي امتخاراتس؟ وقهقه

الثالث وقال ورى اختباراتس مصيّفه ..ورد على نفسه قال مصيّفه والا

مشتيّه.. وقعد يقهقه (يستخف دمه هالدبّي ) قامت وحده من

هالصبابات (يعني ماي سيستر ) وضحكت بسماجه وقالت الله

لايمتخرنا الا في طاعته بس..وكركرت الثانيه قالت ايه عاد عند الامتخار

يكرم المرء أو يهان..ضحك واحد من طقم الاقلام قال قصدتس يكرم

الصتيمه أو يهان وضحكوا كلهم..طبعا انتم بتسالون انا وش كانت حالتي

انا ابد وكالعاده مفهيه..بس خانقتني العبره وبراطمي ترتجف تقل براطم


عاد اهلي بيخلوني في حالي قام طقم هالصبابات قالوا يؤ مسكينه صاحت صاحت..عاد انا ماصدقت خبر::10::

واااااااااااااااااااااااااااااااااااع...طربق طربق (ورحت اركض لغرفتي )

وانحشرت لي في قرنه في غرفتي وانا اصيح وهالبزابيز شغاله

باامانه..واقول في نفسي ياربيه وش هالاهل مايقدروني مايقدرون

هاللؤلؤه الثمينه اللي عندهم (ايه هين لؤلؤه الا تنكه ومصديه بعد)

ياربيه وش اسوي..وقعدت افكر في حل..وشوي طلعت لمبه فوق راسي

زي افلام كرتون( ماخربتس الا افلام هالكرتون)

قلت بس لقيتها مالي الا اني اغير اهلي وادور لي على اهل يقدروني

ويحترموني ويدلعوني مهوب دايما يفشلون فيني..مايكفي الوحده في

بيت رجلها يلعن خيرها..بعد مااتدلع في بيت اهلي .لالازم ادلع نفسي

عند اهلي..واكثر جرعة الدلع لي..عاد جت المشكله الكبيره مين ياترى

اختارهم بدال اهلي..واقعد افكر في اللي حوالي..واخترت ثلاث عائلات

مقربين لي وودهم اليوم قبل بكره اعيش عندهم (واثقه انتي وجهتس)


قمت كتبتهم في لسته الاختيار الاول خالي ناصر الاختيار الثانيه عمتي

دليّل هذولي بدلاء كبدايه..لو ماصلحوا جربت غيرهم

وقلت في نفسي يالله يارورو مشّي هالدموع..وابدي مسيرتس في

الانقلاب على اهلتس
واخذ التليفون..وادق على رقم خالي ناصر.. طبعا بعد مقدمة من

السلامات والمجاملات..قلت له عطني بنتك حصيصه.. قال لي مصخنه

قلت والله لو فيها الموت نادها لي ماعندي وقت

المهم ناداها لي قلت بسوي ذوق واسال اول وش فيها..قلت لها

سلامات وش بلاتس..قالت اسكتي تكفين ترى خانقتني العبره ..قلت

وراه عشى ماسر قالت يختي من اهلي رافعين ضغطي والله يارورو ان

شكلي بدور لي على اهل غيرهم خلاص مااستحمل..قلت في نفسي

يؤؤؤؤؤؤ وش هالحظ
قلت وراه وش صاير قالت تصدقين مثل ماتعرفين عندنا شغالتين الا ان

ابوي اليوم كارفني تقولين حبشيه عندهم مو بنت..من عطلت وهو

مستلمني هو والوالده..امي من قمت قالت ورى ماتطبخين لاخوانتس

حنيني.. تراه زين في هالبروود وسهل مايبيله شي..سويته وانا منطمه

وشوي الا ابوي جاي تعالي ونا ابوتس نزلي الاغراض معي من السياره
في الحوش..رحت شلت وانا برضو منطمه..شوي يجي اخوي صلحوا لي

شاهي وقهوه بيجوني العيال..قلت منيب خل الشغاله تصلح..قال ابوي

افااا تصلح له الغريبه وانتي اختي فيه لا يالله قومي بس تنشطي وصلحي له اللي يبيه
قاطعتها وقلت لها..طيب وشوله هالشغالتين اجل مادامتس مكروفه في

البيت..قالت ايه يبونهن في ايام الدراسه والا اذا عطلنا كرفوني

انا ..قلت لها طيب ليه وش الحكمه يعني حرام عليهم!!
قالت لا يختي اذا قلت لهم شي قالوا احسن نعلمتس علشان اذا

رحتي لبيت رجلتس والا انتي قرمه تعرفين كل شي..قلت طيب الحين

ماقلتي لي وراتس مصخنه..قالت ايه ماخليتني اكمل طول عمرتس

عجله.قالت ان الوالد قال لي وانا ابوتس وش رايتس تروحين

تغسلين الحوش قبل مانجيب الخرفان..قلت لا يبه خل الشغاله تكفى

مااحب الرطرطه في المويه..قال لا وانا ابوتس انامااثق في شغلها ويوم

شافني مبرطمه قال ويالله علشانتس خذي معتس الشغاله

تساعدتس (يقال لك متكرم الحين ) وشكلي عقب ماغسلت دخلني

برد لاني طحت في الفراش وهذاني اكلمتس وانا ريحتي تعايط كلها

فيكس وليمون وحالتي حاله..قلت لها آها لا اجل سلامات والله

قالت الله يسلمتس بس وراتس مكلمه غريبه مهيب العاده..قلت انا هاه

لا ابد بس قلبي قارصني قلت اكيد حصيصه فيها شي (منيب انصب ابد)
يالله على العموم ماقدامتس الا العافيه بااااي

واسكر السماعه من هنا واشطب اسم خالي ناصر من قلب قلت لا

ماابيهم يكرفوني عندهم عاد مايصدق يروح يسفر شغالته الثانيه ويخليني بدالها

وحطيت املي في عمتي دليّل.. واروح ادق عليهم وبعد سيل من السلامات والشهاق والدموع (لاتستغربون تراها حساسه من تسمع

صوتي تصيح..شكلها جاذبتني في حب الصياح)
المهم قلت لها عميمه وين اجل مهيووو؟(يقال لك ادلع بنتها)

قالت وه ياربيه!! قلت وشو؟ قالت مبرطمه علينا وصاكة على عمرها

في غرفتها ومغير مقابله هالبليّه (تقصد النت )

قلت طيب عميمه حوليني عليها ولا عليتس امر..المهم حولتني عليها..

يالله انها ردت علي ..قلت وجع وش فيتس ..قالت تكفين ترى مالي خلقتس وخلق هبالتس..قالت طاعون وش جاتس

قالت توني متطاقه مع اهلي طقاقه وش كبرها قلت وراه؟ (ورى وجهي

نحس عالعالم)
قالت تخيلي جوالي مفصول له شهر وابيهم يسددون ومعيين.. وانتي

طبعا عارفه ان مكافأة الجامعه ماتجينا الا بعد طلعة الروح .. ومشيت

لهم سالفة الجوال.. قلت طيب لهم ابي فلوس بروح للسوق قالت امي ياربيه انتي

وهالسوق وش تركتي للعروس اجل كل شي شاريته ودولابتس مليان ولو لدولابتس لسان كان قال لتسريحتس تبادل وازيدك

يختي قهروني والله (طبعا الكلام لها ) قمت حطيت حرتي في هالنت وقعدت اطقطق فيه..لاوازيدتس من الشعر بيت شكلهم بيفصلون خط

النت..ياربيه وش هالاهل حرام عليهم شكلي بنتحر احسن لي..ثمن

سكتت شوي وقالت..الا تعالي يالبطه وراتس يابنت اللذينا حاظرتني؟

قلت انا هاه والله ماحظرتس بس منيب ادخل النت كثير..قالت هي ايه

هين صدقت اقول فكي الحظر لا اجي اتوطى في بطنتس (عاد هي دبه

وش بيفكني منها ) قلت والله منيب ادخل.. قاطعتني قالت الا صز

وراتس داقه مهوب العاده يالقطوع..قلت انا هاه لا بس قلبي قارصني

قلت اكيد مهيوو فيها شي ..يالله الله يعدل الحال بااااي

وسكرت واانا ضايق صدري ماعاد بقى لي احد ولالي خلق ادور على

احد..وتبون الصز قلت في نفسي ياحليل اهلي..والله انهم بحل عند

اهالي هالعالم علشان بس كلمة طنازه قالوها..بس عااادي المفروض

اخذ الامور بروح رياضيه..قمت فزيت من قرنتي ورحت غسلت وجهي

ونزلت لااهلي والاقي ابوي يتقهوى واجي اعطيه مطخه على راسه

(ذربه البنت ) واقعد اصب له القهوه..مع انواع التعليقات منه وراتس

يالرفله تمدين باليسار..وراتس تملين الفنجال..الخ وانا مستانسه على

قلبي احلى من العسل

شوي ويدخل واحد من طقم هالاقلام..قال رورو..قلت هاه..قال الا نتايج امتخاركم بيطلعونها في الجريده هالترم؟؟؟!!!

انا طبعا يوم نطق هالكلمه...سكت وصرت كني ابو الهووول

( جا على الجرح مره ثانيه)
وقلت وااااااااااااااااااااع ورحت اركض لغرفتي اكتب لسته جديده: