بنوك الحب

تمضي سنين العمر وتقل الأصحاب =والآدمي ربحه بالأيام خافي

أبواب تقفل.. والولي يفتح أبواب =أمراض تنزل.. والكريم المعافي

أشياء تشد أعصاب، وتريح أعصاب =والعمر ما يبقى على طول صافي

هي سنة الأيام دوره.. ودولاب =والنفس طرّاده للأطماع هافي

راع الفقر لا يامن يجر الأسلاب =ومن يغتني لا يامن يسير حافي

الوقت مد أرقاب وينزّل أرقاب =ولولا المرض ما نهتني بالعوافي

وبين القصور.. وبين منسوج الأطناب =الحب يبقى داخل القلب غافي

يا صاحبي لا تحسب الظرف غلاب =لو هو جفاني الوقت ماني بجافي

قدرك بقلبي لو فتحنا له حساب =يملا بنوك الحب وتقول كافي

سوق التداول خاب.. ومساهمه تاب =والا انت سهمك طول الأيام وافي

أربح بحبك لو نزل سهم (ينساب) =ربحي كبير ولو تطيح (المصافي)

انت التجاره.. والخساره بالأحباب =وصلك على تقصير الأيام ضافي

المال يلحق دام للمال طلاب =مار البلا وأحباب قلبك مقافي

لا صار خلك ينحسب ضمن الأغراب =أو غاب بالدنيا صديقٍ سنافي

والقل قل العرف.. أو قل الأصحاب =والرزق بإيد اللي يدير السوافي