قصيدة أبكتني......!

الله الّي راد والعقده قضاها الّي عقدها = لا على الدنيا سلام ولا لباقي العمر زينه

الفضا ما كنه إلا خيمة طاحت عمدها = والفرح ماكنه إلاّ شيخ انقصت يدينه

والعمر قطعت زجاج انكسرت ولا طال أمدها = والعرب في العيد بدموع اليتامى مستهينه

والشوارع لفها ثوب الظلام الّي هجدها = والبيوت أطلال من عقب المحبة والسكينه

والشتا والليل والبرد وسما يصرخ رعدها = والعيون الّي ورى الشباك مذعوره حزينه

طوّلوا في الكهف الأصحاب وبقت روحي وحدها = كنها في كوكب ثاني خلا من ساكنينه

الوداع الّي بعلم العين يعبر من رمدها = والوداع الّي بلا علم لقفص صدري غبينه

والوداع الّي بلا رجعه علي أمرّ وأدها = والله إنه غرغرت سم وسكاكين سنينه

والعنود الّي جفيت الناس والدنيا بعدها = مـدت الفرقا لغاليها وهي تعطي الثمينه

((وينها كيف اتركتني ليه ما جت في وعدها = والقمر لا طل خابرها تجي بيني وبينه))

رحت انادي واتلمس في مهب الريح يدها = كني حصان بلا صاحب طوى البيداء حنينه

رحت أصيح الصبح وينه والعرب مارد أحدها = ما سمعت إلا صدى صوتي يقول الصبح وينه

كنهم من يوم ذيك الشمس غابت عن بلدها = طلعوني في النفوذ وصكوا أبواب المدينه

كنهم من يوم ذيك الذاهبه محدٍ وجدها = كل رجال من الشرهه قلع في الدرب عينه

أثرها ماتت وماتت كل فرحه في مهدها = والربيع أقفت به الّي كانت التاج لجبينه

(جاورت عقب الحدايق حفرة مقسى لحدها = حفرة ماني مصدق كيف ضمت ياسمينه)

(للحزن فيني مثل ما للطهاره في جسدها = ويش اسوي لا فتشت الّي لها وسط الخزينه)

زخرفت حلم وبنت له مسكن وسمت ولدها = آه لو غرد ولدها في خميلة والدينه

عاهدتني وظفرت بيمين أقوى من عهدها = والصبي لا خير فيه إن كان ما نفذ يمينه

ما تثقى عن رثاها عرق أكتظ بشهدها = ولا تبقى خلف قضبان الجفن عذراء سجينه

كيف عند العالم أيام العزا ما أحصى عددها = والعزاطالت شهوره والله أعلم كم سنينه

لا الثرى فيها نبات ولا المشي خفف نكدها = لا السما فيها طيور ولا البحر يمه سفينه

لا القمر هذا مساه ولا العصي هذا رغدها = لا الزهر هذا شذاه ولا الذهب هذا رنينه

قالوا الشيخ الفلاني مرجع القوم وسندها = قال يبشر بالعوض والعلم جينا ناقلينه

ساقلك بدر البدور الّي نشدها من نشدها = جادل هزت عروش وخيبت روس الذهينه

قسمها في رسمها في جسمها إلاّ في رشدها = واسمها ان جا للغضب قومه على الألسن رطينه

اترك الناي وعطية شيخنا غن لسعدها = وانبسط يا عم وانسى الّي ورى التربه دفينه

قلت ولصدري تناهيد تروع من شهدها = آه وا ويلاه من يجلب على قلبي ظنينه

خلو أغلى ذاهبه ترعى ربيع الّي فقدها = والعطا راعيه محد صوبه الله لا يهينه

(لو ضمنت الجنه تفاحة القلب وشهدها = قلت من بكره عسى مجنونها تاقف سنينه)