من روائع الدحيمي

ياشيـخ .. جيتـك مـن هواجيـس ٍ رحاهـا تستديـر
اسبـاب حلـم ٍ .. ياالهـي .. مـن عواقبـه انجـنـي
ياشيـخ .. تكفـا .. فسّـره يومـك بتفسيـره خبـيـر
مـن روعتـه لامهتنـي زادي .. ولا نـومـي هـنـي
ياشيخ .. انا مانـي بكافـر .. يزبـن مشعـوذ حقيـر
ياشيـخ .. جيتـك مسلـم ٍ ويقـول : يـارب اهـدنـي
ياشيخ .. نـدري مايجـي قبـل رمضـان الاّ القصيـر
والموت .. ذيبٍ مـادرى ويـن الربـاع .. مـن الثنـي
ياشيخ .. انا عندي شـدادٍ .. ميـر .. ماعنـدي بعيـر
ماولف قلبي عالشقا .... مير الشقـا اللـي .. ولفنـي
حلمـت ياشيـخ بعقالـي .. طايـح ٍ فـي وسـط بيـر
والناس حولـي .. نـوب تمسكنـي .. ونـوب تهدنـي
وهجيت ابي الجيره .. لقيت( الضبـع) ياشيـخ المجيـر
وطحت بردى الثنتيـن .. يانّـي آكلـه .. والا .. اكلنـي
قلت أعطي الخبت اقدمي .. مثـل السـروق المستذيـر
واذا ( جهينه ) عندهـا صـدق الخبـر.. صرت(جهنـي)
وكنّـي زبنـت ظـلال نخلـه .. باتفيّـا مـن الهجيـر
والاّ انّـي بجّـذع ٍ يقـلْ :- ماغيـر ( مريـم) هزّنـي
وشفت النبي ( يوسف ) بيده ( صـواع ) مليـانٍ شعيـر
وفي رحل (بنيامين) .. ذيـب يقـول :- معكـم ودّنـي
(وسبعة سنابل) .. وسط حقل .. براس ضلع .. اكلته طير
وسنينها اْربعطش ..( سبع عجاف) ..( في سبع ٍ سنـي)
واصوات رجليـن البشـر ( للنمـل ) بالأمـن البشيـر
( والهدهد ) يدوّر علـى ( بلقيـس ) مـن بيـن البنـي
وكنّي حطبت من السّمـر فـي صيـف بـرده زمهريـر
واْخـذت لـي عـودٍ مـن الحزمـه باْشبّـه .. شبّنـي
وشوي والا ّ انّي .. تقـل مظلـوم فـي امـر ٍ خطيـر
في ديـرةٍ .. واصفـى هواهـا كـان .. عـج ٍّ سمّنـي
ديره .. بهـا ريـش النعـام يجّـرح فـراش الحصيـر
( وسبعين جدر ٍ ) .. ينهدم مـن شـان جـدر ٍ ينبنـي
والله يجيـرك شفـت رزقـي مثـل بسـتـان ٍ كبـيـر
في مغرسه طيّب .. ولا ادري ليـه .. ماطـاب الجَنـي
( والطيـب ) .. ذنـبٍ مابعـد عذّبـه تأنيـب الضميـر
(والخبث) .. شاعر .. كل عذراء جاته تقول :- اهجنـي
( والشعر ) .. دجال ٍ ينـادي : - يافـرزدق .. ياجريـر
غنـوّا معـي ( يامـن هـواه اعــزّه ... وأذلّـنـي)
( والعين ) .. طرقي تخنقـه غربـه ويضنيـه المسيـر
( والصدر) .. طفل من الغلا .. يشهق نشيـدة موطنـي
واصغر عيالـي يلفـظ انفاسـه علـى علبـة عصيـر
المشكلـه ياشيـخ .. قدّامـي .. تـقـلْ .. ماهمـنّـي
وكنّ ( الغنى ) .. فارس من الديباج .. وسلاحه حريـر
ماله عدوّ الاّ ( الفقـر) .. كـم جـاب قاصيـه الدنـي
( والفقر ) .. عودٍ .. له مرَه مشلوله.. وورع ٍ ضريـر
في ارذل العمر .. ان وِقَفْ .. قاصي شموخـه منحنـي
مير افتني ياشيـخ .. ميـن افضـل ؟ جـزاك الله خيـر
ماادري الغني ؟ والاّ فقيـر الحـال ؟ .. ياشيـخ افتنـي
هو ( الغني ).. اللي يزكّـي بالسنـه .. مـرّه .. فقيـر
والاّ ( الفقير ) اللـي .. قضـى عمـره زكـاةٍ للغنـي