الشاعر : عبــــد الرحمـــن بن عــــويد الحـــربي

ياقلب لو قلت آه ماانته بمسموع
سود الليالي مايجن لك مطاويع

ياقلب خلك مع ظروف الدهر طوع
وبعض الطواري خلها تضرب الريع

مالك ومال الناس طامن ومرفوع
اصبر تحت حكمة مدير الذعاذيع

دنياك هاذي بين طامع ومطموع
على الولي مدخالها والمطاليع

تراك لو تمشي على الرجل مقطوع
أخير من منة عفون طماميع

بعض العرب محد ٍ ذكر منه منفوع
من شبته حتى تمطى المراكيع

عند الطلب كنه على الوجه مصفوع
يشح في ماله ردي المراميع

لو الجمالة بعد كفه عن الكوع
ابعد عليه من النجوم اللواميع

والليا هرج سوى من الهرج مشروع
وإن قلت ماهاذا السنع قال مااطيع

يركب على غوجا من الكذب مصنوع
يرخي مع البيدا حبال مصاريع

ليت الردي وسمه على الوجه مطبوع
ينقص بحقه عن حقوق البواتيع

والطيب لاهل الطيب مثني ومربوع
شراية المعروف بالعسر وإن بيع

وفيهم كريم مدته تقطع الجوع
وتروي الليا نشفن النبابيع

وفيهم شجاع بالمهمات باتوع
من الكدر خصمه شرابه قراطيع

وفيهم حكيم الراي في كل موضوع
رايه يصيب وبعض الاريا متاييع

دين ووفاء وبراسه الفكر مجموع
وماحط في صدره من السر ماذيع