وكم واحدٍ له فالمجالـس مبابـاه / واليا سمعته قلـت لاوالله البيـه!

بعض العرب ودّك ببعده وفرقـاه = لو ان بعده ينشرى كـان تشريـه

وبعض العرب ودّك بقربه ولامـاه =لوفرّقتّكـم سـود الايـام تغليـه

لااحتجت له في حزة العسر تلقـاه =وليا نخاك لحاجتـه قلـت لبّيـه

لنّه على الطالات نفسـه مضـرّاه =وابوه من صغره عليهـا مربّيـه

شروى الخوي اللي ينومس مخاواه =اللي ينومسني بذكـره وطاريـه

ولاّ الثياب ابها رياجيـل واشبـاه =شياً بيان وشـي ربـي مخفيّـه

كم واحدٍ ينفخ على الناس علبـاه =لوهو مايدري وين ربـي موديـه

وكم واحدٍ له فالمجالـس مبابـاه =واليا سمعته قلـت لاوالله البيـه!

والياحداك الله على بحثة اقصـاه =تلقاه هرجٍ صامل الكـذب قافيـه

زوااال بثـيـاب الاوادم مخـفّـاه =وكلٍ تزيّن له ظنونـه مساعيـه

والرابح اللي عنهم الخالق اغنـاه =عرضه ستير وواجبـه مايخليـه

يعز نفسه ليـن تبـرك مطايـاه =ولغيـر ربـه مايكثّـر مشاكيـه

ومن لااستطاع يعز نفسه بيمنـاه =لايلحق ادنى الربع لوم ومشاريـه

لومه على نفسه اليا حسّب اخطاه =ولابد قلبه مـن منامـه يصحيـه

واللي يخاوي الرجل حشمه لمخباه =والله لو اجلس لحالي ما اخاويـه

انا آزن الرجّال من يوم ما القـاه =وانزّلـه فالمنـزل اللـي يكافيـه

اما امدحه لاوحيت ذكره وطريـاه =ولاّ اطلب الله لايجيني ولا اجيـه

ولاكل من يصخر بيـوتٍ مقفّـاه =ودي بمعرفته وممشـى مماشيـه

احدٍ اليا نادانـي اسمـع منـاداه =واحدٍ يناديني لكن ما التفت فيـه