♥ دام عـــــــزك ياوطن ♥

أنا السّعودي رايتي رمز الإسلام = وأنا العرب واصل العروبة بلادي
وأنا سليل المجد من بدأ الأيام = الناس تشهد لي ويشهد جهادي

دستوري القرآن قانون ونظام = وسنة نبي الله لنا خير هادي
امشي على الدّنيا وأنا رافع الهام = وافخر على العالم وأنا اجْني حصادي
إذا تأخّر بعضهم رحت قدّام =وإذا توارى خايفٍ قمت بادي
إن جيت ساحات الوغَى صرت قدّام =وان صرت بلْحالي فلانيب عادَي
واظهر على غيري إذا صرت بزْحام =عقيد قومٍ بالطّبيعة ريادي

وطنا من تهاون به عسى امـه ومرتـه تبكيـه = ماهو ببضاعة فـي بسطـة البيـاع مبيوعـه
وطنا له علينا ديـن وان جـا موعـده نوفيـه = بالايدي حافظينه مثل حفـظ القلـب بضلوعـه
وطنا ما يرحب بالحريب ولا نتصـر غازيـه = للغـزي مقبـرة ولخايـن الاوطـان بالوعـه
وطنا نستجير بهضبتـه ونمـوت فـي واديـه = ليا واقت سبور القـوم كـل القـوم مقروعـة
ليا دقـت نواقيـس الخطـر بارواحنـا نفديـه = فواتير الفـدا فـي ساحـة الميـدان مدفوعـه
ليا قمنـا وشافتنـا العـدا مرصادهـا تخليـه = تحابـى بالركـب ورقابهـا بالـذل مخنوعـه
وطنا ما نبيعه مثـل مـن باعـوا ولا نعطيـه = أسامينا على صحـراه مرسومـه و مطبوعـه
صبرنا فيه يوم انـه دهـور وهالـك ظاميـه = شحيح الماء هماج ولا يبـل الكبـد قرطوعـه
صبرنا فيـه حفيـا والخـلا باقدامنـا نطويـه = وحزمنا البطون ولا ذبحنا الجوع فـي جوعـه
تخيلنا المهار ومـن نطحنـا بالثـرى نرميـه = نهوش لمن جديلتها علـى المتنيـن منسوعـه
ومنا من ركب فوق الخشب موج البحر غاطيه = يحول بالحبـال وياخـذ المحـار مـن قوعـه
رجال البر ورجال البحر محد ٍ تـرك عانيـه = كرام مـن كـرام وخلـة الأجـواد مرقوعـة
يجيك الرجل وجهه مبتسـم للضيـف ويعشيـه = لو انه في الحطب يضرب بمسحاته وفاروعـه
صبرنـا فيـه وافلحنـا وقلنـا ياوطـن لبيـه = تطمن لا تخاف وحارسـك يرعـاك بدموعـه