يامعجبه شكراً انا مالي احباب
ولانيب ادوّر بالقصايد فريسه
شاعر جبرت القاف يركع لي إعجاب
وأخترت من غيد القصايد نفيسه
أجيبها من غيمةٍ بين الأهداب
لها سنه في رمش عيني حبيسه
بنت الغيوم الخاطفه كل الالباب
تجبر خفوقٍ لا حدا حث عيسه
وتنزل على قفر الدفاتر والاعصاب
مثل الندى على الورود التعيسه
مانيب اغني حب وحْروفي اسراب
رسايلٍ بين الونيس و ونيسه
عاف الهوى ليلاي من ظلم وعْتاب
وليلاي عافت فالهوى شعر قيسه
إلهامها حلم وخيالات /وإسهاب
في كيف تغيير الوجيه البئيسه..؟
ودام ان جسم العيب ما غطْه ثياب
الحر ما يرضى الحياه الدنيسه
يعني أعيش العمر مجموعة أغراب
ولا اْرتضي عقلي سوايه يسيسه
أكتب من أحساس العنا شعر مرتاب
رمثٍ صبغ وجه الزمان بوريسه
فوق السما لو كان من طين وتراب
والرجل تُعرف قيمته من جليسه
رجلٍ حضاراتي تقاليد الأعراب
ومواقفي تُبنى على اشيا رئيسه
نادر ولو أضرب مثل دون الإطناب
كل اربعه عْقود سنه كبيسه
زودت لي صفرٍ ماْني غاوي حساب
لكن مدى الايام ما اْحدٍ يقيسه
أعيش من وقتي مثل باء الإقلاب
والوقت حَمْي اْمن التناقض وطيسه
ضحيت في حلمي على شان الأصحاب
يا قووم يا بعض النفوس المخيسه
أعضّ من غبني على ناجذي ناب
أرخي طرف أذنك يهولك ضريسه
أصدق رجل فالعالم الحين كذاب
يكذب على أدنى شي لو هو طفيسه
وشلون أصدق بنت عطيني اسباب..؟
والحر يكذب كيف عاد الحبيسه
ماني مخاوي بنت خويي كتاب
ترضين..!! والا ما انتي أول نفيسه
تجي تقدم لي قرابين الإعجاب
واقول انا مانيب ادوّر فريسه
هاتي سبب واحد وانا ادّور احباب
يقنعني ان الناس ماهي تعيسه
يامعجبه شكراً !! أنا مالي احباب؟؟
يامعجبه شكراً !! أنا مالي احباب؟؟ 
النمط الخطي
