يالله ياللي كل حيٍ يسالك

يالله ياللي كل حيٍ يسالـــــــك =يا واحدٍ كلٍ يخافك ويرجيـــــك

يا قاسم انوال الملا من نوالـــــــك =وقبضة نواصي الخلق كلهن بياديــك

اتفك عقد احبال عبدٍ شكا لــــــك =مستبرمٍ حبله بعقد الشرابيـــــك

بعيدٍ عن الداني دعا والتجا لــــك =يا من هو المالك وحنا المماليـــك

ارمي بحالاتي لذيك التهالـــــــك =تفرج عن القلب الذي فيه تشكيـــك

ما به من الحرفات الا الدعا لـــــك =والحيل قصر والأيادي مفاليـــك

فيلا اقتضى عسري بحسن الرضا لك =فاجعل لنا صبرٍ على العسر يرضيك

سايلت داعي البين مالي ومالـك =من كل صوبٍ كاثراتٍ دعاويـــك

قال ان هذا الأمر لا لي ولا لـــك =أمرٍ قضاه آلهك اللي مسويــــك

لا تعترض أم القدر في جدالـــك =ولا تحسب ان اللي مصيبك بيخطيك

قسمة احظوظ الخلق قسم السوا لـك =ومكتوب حظك يالفتى في نواصيـك

جف القلم باللوح فيما اقتضا لــك =إما سعيد الحظ وإلا مشقيـــــك

وأنا اشهد أن اللي كتب لك ينالــك =يالعبد ربك باسم حظك يناديــك

كلٍّ بتقدير الولى طاب فالـــك =اصبر على ما قدر الله يأتيـــك

ولا تلوم النفس فيما جرا لـــك =تبور غالي سلعتك بين أياديــك

ويلومك اللي مادرا عن حوالـك =ولا درا ويش الدهر محدثٍ فيــك

محدٍ درا ويش الذي صاب حالــك=وما جرا لك مع صديقٍ معاديـك

بمكايده يبلن الأيام حالـــــك =وعن الموارد قاصراتٍ مداليــك

ما شام بك من ديرتك عن عيالــك =وما عرضك درب الخطر والتهاليك

وين انت والأقدار يوم ارتحالــك =في وسط غباتٍ بها الموج عاليـك

مرٍ يمين ومرةٍ من شمالــــك =والعرب من التريك تأخذ بياديـك

إن قيل رد البوش واربط احبالــك =ضاقت على احرارها والمماليـك

فاعزم وشم ولا تضيق المسالــك =ولا تسوي يافتا شومت الديــك

وافهم نبا ما أقول لك طاب فالـك =سعود الفتى بالحظ من غير تشكيك

وإن جاد حظك باع لك واشترا لـك =فوايده من كل الأبواب تأتيـــك

وإن بار بك دلاّ يهزل حلالــــــــك =وبردا الثمن لزماً يبيعك ويشريـك

وإن جاد حظك بالمجالس حكالك =وصدق مقالك كلٍ لك يحاكيـك

وإن باربك دلاّ يكذب مقالــــــك =وتصير كذبات الملا كلهن فيــك

وإن جاد حظك بالمنازل بنا لــك =بيتٍ رفيعٍ شامخ الطول يذريـك

وإن بار بك خلاك تنقل اعيالـك =من دار إلى دار ودارٍ اتجليــك

وإن جاد حظك كل شيءٍ صفا لـك =وقرايب الخلان كلن يصافيــك

وان بار بك بين جميع العدا لــك =وصار المحب أعدى عدو يعاديك

وإن جاد حظك كل شيءٍ عنالــك =ويباشرك عند الموده ويعطيــك

وإن بار بك ضليت محدٍ بحالـــك =ولا بفنجالٍ من البن يسقيــك

وإن جاد حظك قام واطلق اعقالك =ومشا معك في كل دربٍ يباريك

وإن بار بك جود متين الثنا لــــك =وعن كل دربٍ لك يعقلك ويثنيك

وإن جاد حظك كل شيءٍ زها لـك =حلياه برواح المجالس تزهيــك

وإن بار بك شين حلايا خيالـــك =إلى اقبلت تغضىكل عينٍ تراعيك

وإن جاد حظك كل شيءٍ أضا لـك =يشبه فم القنديل نوره يقديـــك

وإن بار بك عزيل حالي وحالـك =ارذل رذيلٍ هافي الجد يوذيــك

يالعبد لو كثرت حث ارتحالـك =وعرضتها درب الخطر والتهاليك

تازي بلا حظ بعيدٍ محــالــــك =وقلوص عزمك بالمهامه اتخليـك

تسعين عام يافتى ما بدا لــك =ولا لاح في بالك لزومٍ يصافيـك

قل ول يا حظي على ما جرا لـك =إلى قل عونك ماجتهادك بيغنيـك

اكتب مكاتيب الشقا والعنا لـــك =قل ول يا حظ الشقى اتعبت راعيك

يا حظ لو ذيب المفالي عوا لــك =في مجلسٍ حاويه صوتٍ يعاويك

يقــول لـو حظك سعيدٍ نما لـك =لو عشرة اولادك عضيدٍ يكفيك

واليــوم لا تأمن يمينك شمالك =يبوقك اصدق صديقٍ يماليــك

ولا يغرك إن لقاك وحكا لــك =لو عطالك من المواثيق يرضيك

اخذ الحذر كل الحذر لو صفا لـك =عيبٍ على انك تأمن الخصم ياليك

تحرز بسو الظن وابصر بحالـــك =واحذر جليسٍ ضايع الراي يعميك

من سو طبعه إن حكا بك حكا لك =يرضي عدوك بالنميمة ويرضيك

راعي المكر والبوق والكذب سالك =وراعي الثنا ضاقت عليه المساليك

يمشي ورأيه ضايعٍ بالمهالـــك =لا شاف من دونه على الوكر عاليك

ما تنظر الأقدار فيما جرا لــك =شيوخ القبايل يتبعون المماليــك

فاعزم بعون الله على ما بدا لـك =واقصد إله العرش حسبك ويكفيك

صاروا ابطن اللحود ارض فمالك =صبرٍ فهل منهم صديقٍ يعزيــك

لا بأس لو من كل طرفٍ جرا لك =هامي سحاب الوجد من فوق خديك

يا قلب هيد عن تذكر احوالــك =واصبر عسى رب الملا يعتني فيك

اصبر عسى تعطا خلف ما غدا لك =رجلٍ إلى سامتك الأيام يشريــك

يارب تجعل واحدٍ من رجالـــك =عند الشدايد مزبن اللى يواليـك

في يوم ما تعطي يمينك شمالــك =مثقال حبة خردلٍ من حسانيــك

تعطيني مقصودي وأنا اللى أسالـك يا سامعٍ من جا لبابك يناديـك

واختام ملفوضي لنا في مقالــك =ازكىصلاة إلى هادي الرشد هاديك
,,,
,,
,
الشاعر : محمد بن عون