مطرق الزلات

كريم يابرقٍ من القبله علـى نجـد معـزوم = ينفض أرّدون الغـرّ ويشـرّه ديـارٍ مرهـا
قدم هماليله أسبورٍ له علـى ذيـك الحـزوم = بامر الولي تباشرت والخيـر فيهـا سرهـا
والّطف نسيم يهب ذعذاعه تسوق إله الردوم = وتقفته غرّا كمـا الهضبـه بدربـه جرهـا
قامت تسوق من المناشي بين ليل وبين يـوم = تداقلت دهم المـزون اللـي تقفّـت غرهـا
تنفض عزاز الارض وتخلخل جزيئات الرجوم = وتسيّل الوديـان والريضـان يبـرد حرهـا
قام يتبخص حاجةٍ للمسنيّه واوفـى القسـوم = وارهى عليها بالعطاء عشرين يـوم يبرهـا
ليا ختم سبله تقول يخالـي الاروض وخـدوم = إبشاية الله كـان ماسـر العـرب ماضرهـا
يسقي ديار اللي تحفظ إوثوقها من كل قـوم = ويقصر عن اللي حلوها مايختلف عن مرهـا
الوقت مايدرى وش إبـمخباه لو ماله هـدوم = يكشف قناعات المزيّف لـو عيونـه قرهـا
مسكين ياللي تاتحجب الكون وكبـار النجـوم = كفّك صغيره والعيون الحـول عنّـا صرهـا
طايح نصيبك من قديمات الليالـي ومحكـوم = تكوى من الجمره وبثويبـك تقـوم تكرهـا?
تصغر وتاكلها دبل دوما تحت حـد السهـوم = تشتالها في حيد بشتك رغم الانـف تصرهـا
من عقبها من مطرق الزلات مأنته بمحشـوم = مافيه شي بلا سبب وانتـه ماتجهـل سرهـا
لكن مادام الله رزقني صاحب إيسـد اللـزوم = يفدونه اللي موجـة التلفـاز عمـد إتفرهـا
إليا إعرفوني من لهم في الطيب والعليا وسوم = قومٍ ماعندي من وفاهم غيـر ( لله درهـا )
ماهمني لو تنكر الرفقـه ضعيفيـن العـزوم = اللي على الشاشه تهيجنها ونـوب إتجرهـا
(الزبرقه)ماتنفع اللـي مايحَفْضُـون السلـوم = واللي ثيابه مالـه آزرّه ياكيـف إيزرهـا ؟
يامزريٍ عن علم واحد كيف بتجيب العلـوم؟ = اسرح على كيفـك لكـنّ دروبنـا لاتْمرهـا
يافاتحٍ باب الزريه فوق راسـك لـو تـزوم = زريـةٍ تسبـح بغبـات البحـور وبـرهـا
مدام طارحتك يدينك طيـح جعلـك ماتقـوم = ياللي تخم حويدهـا نوبـه ونـوب إتغرهـا
انشهد ان بعض العرب يروح اخير من القدوم = والله يكثّر خيرها لكـن كـان كفّـت شرهـا