صفحـــة جديــــدة

تعال وشوف حالي وش مسوّي = مراحي ياحبيبي مع غدوّي

هموم(ن) داخل ضلوعي تلاطم = لها وسط الحشا صوتاً مدوّي

هموم بغيبتك تجتاح صدري = تحطم كل شي بلا تروّي

ياليت تقول ويش اللي فعلته = بعد هذا دخيلك وش مسوّي

تجرب بي اساليب التجني = حشا والله لو أنك عدوّي

كتبت من اجلك الشعر ونظمته = على شانك كتبت الخط توّي

أنا لو تطلب عيوني عطيتك = أجي لرضاك كلي من علوّي

عموما كل هذا انا نسيته = ابا امحي كل صفحاته واطوّي

واببدا بعدها صفحه جديدة = وباشعل شمعتي وأشب ضوّي

بعدها يمكن يفيد التمني = ويطيب الوقت لي ويزين نوّي

عسى من بعدك أسلى وتهنا = ويرجع كل عرقا بي مروّي

سامحك الله يالذيب الخلاوي= على شاني دخيلك لا تعوّي

يزيد الحزن صوتك لا سمعته= تجر الصوت في صدري تكوّي
غريبة انتي يالدنيا عجيبة = عجزت أعرف صديقي من عدوّي
على ما قيل من جرف بعدامه= عاداتك يالنصيب وما تسوّي