(( مسكين )) ....... فيصل اليامي

مسكين ماتلقى مشخص لحالتك = ظنك جميع الناس ترخص ثمنها

اعقل ترى ماني بناقص جهالتك = ان طعتني شف ناس غيري وهنها

ماني بعامل وجاي ادور كفالتك = محبتك ذله وانا شوم عنها

ظلمك على نفسك تعدى عدالتك = نفسك بتزعل منك صحصح وصنها

مادري احسك منبسط من هبالتك = خيول عقلك ليه تفلت رسنها

النقص في عقلك يشابه رسالتك = فيها جزء من النص مفقود منها ..

اكتب علي منشيت وامحي مقالتك = فاهم حيلك بسرها وبعلنها

لادلني للحب مابغى دلالتك = دولتك باخصها وباخص مدنها

لوك وكيل الشوق للغي وكالتك = راحت سنين الشوق وروح زمنها

صعوبتك عندي تساوي سهالتك =لانك عجينه في يدي واعجنها

اللي صدمني فيك قلة اصالتك = ناس مثل شرواك محدن ضمنها

ماني مطولها ولا ابغى اطالتك = قلبي الى من عاف حاجه ركنها