بناتــــنــا ما بين شــــاري وبيــــــااااع

البارحه مانمـت افكـر بالأوضـاع = وش لون كيف يصير لا بـد حيلـه

قمت اتقلب كن في جسمي أوجـاع = اجلس وأقوم أظنـي القـا وسيلـه

قامت تواردني هواجيسـي اجمـاع = واحترت مابيـن العميـل وعميلـه

قضيت ليلي فـي تفاكيـر وصـراع = بين الحقيقـه والوهـم والفشيلـه

حال العرب مقفـي ولا فيـه فـزاع = الوضع مزري مـن ليـالٍ طويلـه

نشجب ونستنكر ولا سامـعٍ طـاع = هرجٍ بليا فعـل وش نرتجـي لـه

القدس راحت بيـن مـازع ومـزاع = ولبنـان تتبعهـا بنفسـن ذليـلـه

الغرب في ثرواتنـا تبنـي اطمـاع = وحنا ليـا مـن لاح بـرقٍ نخيلـه

نجري ورى الكوره ونومي بالاصباع = لامن ظفر بالكـاس منهـو يشيلـه

شبابنا في مرتـع اللهو قـد ضـاع = وشيابنـا كـلٍ يجمـع حصيـلـه

بناتنـا مابيـن شـاري وبـيـاع = بالسوق من دون البراقـع بشيلـه

في عالم الموضه من العري شبّـاع = جوعا من الحشمه وسلـم القبيلـه

البيـت مهمـل والبزاريـن جيـاع = والزوج مهما قـال ماتنحنـي لـه

ضاعت عقول الناس واللي شرا باع = بـدل دروب المرجلـه بالرذيـلـه

ما اعم قولـي فيـه للحـق تبـاع = ناسٍ على درب الشرف والفضيلـه

حبيت اوضح شي خافـي ومنـذاع = به ناس تجهل بـه ونـاسٍ دليلـه

وصلاة ربـي عـد ماهـب ذعـذاع = على شفيـع الخلـق راع الوسيلـه