الله من ضيقةٍ بالصدر

الله من ضيقةٍ بالصدر حابسها = قامت تزايد عليّ وتكتم انفاسي

منها السعاده بقلبي ضاع واهسها = وياما اتعبت مصدر التفكير في راسي

نارٍ تلضى بوسط القلب واونسها = شبت بقلبٍ من اللوعات منحاسي

فكري غدت به هجوسي يوم اهوجسها = لا نامت الناس يبدى ليل هوجاسي

اكنّها بالضمير و دوم اسايسها = وصارت سبايب غرابيلي ووسواسي

* اضحك مع الناس واجلس في مجالسها = والهم وسط الحشى مثل الجبل راسي *

احاول اسند على نفسي واونّسها = لا شك يظهر على محيّاي لولاسي

وهموم قلبي تهامسني واهامسها = والشمس تشرق وانا باقي بمجلاسي

تلعن ابو خيّر ايامي وخامسها = هواجسٍ لا غشتني تطرد اوناسي

تخفي نجوم السعد في ليل عسعسها = حتى القمر ضاع نوره وسط الادماسي

آخذ نصيبي من احزاني واقيّسها = الكيل ميزان والاطوال مقياسي

خلوني اعيش وسط الصدر حابسها = اما يزين الزمن والا الفض انفاسي




نواف العبيوي