آتقاطر في قصيدي, يعتصرني هم قاسي
ما لقيت إلا سرابي يوم حاصرني اليباس
ارشفي صافي أنيني..يا سنيني: دوك كاسي
جفت أعذب أغنياتي.. وامتلا هالكاس ياس!
أسئله كانت تلاطم..تربك أعماق المآسي
لاحت خيوط السواحل فوقها أشباح ناس
آتلفت وين ابـ ارسى..آه يا كثر المراسي
للمنايا ألف مرسى كان أقربها النعاس!
يمكن إنتي:
آخر فصول فـ رواية
أو بداية..أو نهاية
أو
موسيقى
أو
قصيدة
أو غواية
الأكيد
إنك حكاية!
يا جفافك..
من عيوني طفل شافك..
كان يلعب في التراب اللي على أطهر ضفافك!
ما لمح فيك اختلافك!
ما تنبّه لاقترافك للخطيئة.. واعترافك!
ما تساءل: هو يحبك أو يعافك!
كل ما فيها: هرب مرتاب..
خاف أنه يخافك!!!
كانت الساعة جفافي يوم قمت بتسري
كانت اللحظة سحابه تبتعد عن ظامي
تحت جلدي كل عرق صاح.. بدري بدري
ما وعيت إلا غيابك ينهمر قدامي
كنت مدري..لا أحس الأرض كانت مدري
كان هذا الكون كله يكتب استفهامي..
كانت الدنيا غياب وكان حزني مغري
للرحيل في ذكرياتي.. للسفر فـ آلامي!
يالحبيب..الحزن قاع الطريق
اللي يودي للحقيقه..
الحقيقه ما توارت
بس هذا الحزن موحش!..
دوم نتحاشى طريقه!!
وإن مشينا ما نواصل
نجزع ونعجز نطيقه!
ما وصلنا.. والإجابة تحتضر..
استمرت تنتظر!
دقت على أبواب النحيب
ما من مجيب!!
..
لا تجين!
في داخلي حفلة..
فيها ثلاث صغار..
من بينهم طفلة..
لو جا المكان كْبار..
تهرب!!
تبعد عني سنيني سنين.. ما تبين!
وان جيتها بعدين،
بتصيح فيني: «لا تجي»!
لا تجين!،
لو جا المكان كْبار، ينهار!
وش تبين؟!
ما بديتي تنضجين!!
انضجي!
حبيبي لو تثور الأسئلة فينا ويركبنا سكون الدار!
ويسكنّا الحزن والخوف من باكر قبل ما تنولد شمسه
نبي ندحر السواد اللي يحاصرنا نبي تتبدل الأدوار
نبي ننصر بياض قلوبنا.. نجتاح كل من حاولوا طمسه
حبيبي ما تذكّر بيننا من سبعة أعوام مضت وش دار؟!
جلسنا بآخر حدود الزمان الحلم..قلنا فـ آخر الجلسه:
نهادن باقي الأيام لازانت، وإذا ثار الزمن ثوّار
نعلم هذي الدنيا وش العاشق إذا ما استوعبت درسه
سندريلا: ليه كنتي غير في الأسطورة؟
هو صحيح إنك عشقتي من شراك بْـ عمره؟
(الأمير) اللي سهر لك ما جرحتي شْعوره؟
هو بقى حبك، وما هانت عليك العشرة؟
أو بعد كانت نهاية قصتك مسحوره
مثلما سحر البداية في حديقة قصره
يوم جيتي للقصر والزيف يملى الصورة
ما درى إنه كيد ساحر، وانخدع في سحره
كان دوره: ينحني لك، بس هذا دوره!
كان مشهد للهزيمة، دورك: المنتصرة!!
يوم جيتي كان حلمك تسكنين قصوره
يوم جالك كان حلمه تنبتين بـ صدره
كان حلمه تزهرين بروحه الممطوره
من دموعه ترشفين العشق قطرة قطرة
يوم بانت كذبتك، هو ما خرج عن طوره!
هو خرج عن طور وحدود الزمان بكبره!!
هب في وجه الوهم وأعلن عليه الثورة
انتفض ينبض ضبابك، والتفت في حسرة ..
قال: طالق.. سندريلا كذبتك مبتورة!
وابتعد يشطب يعيد اللي مضى من شعره
سندريلا: صاحبك بالضبط كالأسطورة
شامخٍ مثل الشجر داخل حديقة قصره!!
أكبري كبر الخطية
أكذبي كذب الليالي
صادقة عنده، وفيّة
لا يهمك.. ما يبالي
عذرك: الدنيا رديّة!
عذره: العاشق مثالي
عاد ما تسوى القضية
كان أغلى، صار غالي!
والحكاية سرمديّة!!
ما لها أول وتالي
بنت كم كانت غبيّة!
فتّحت والحلم عالي!
ويوم صارت واقعية
ما تبي: حالم خيالي!
(أففف) منك ما تطفّي شمعتينَ!
عاش شمعك يشتعل برد وسلام
ذي شموعك ترقص يْسار ويْمين
ظنّت أنفاسك موسيقى!.. يا حرام
اصبري لحظات.. لا تستعجلين
اتبعي دقّات قلبي بانتظام:
غمّضي، يالله تمني، وش تبين؟؟
احلمي حلمك على اجمل ما يرام
احلمي حلمك، وأبد من تحلمين
ياقف الواقع لـ حلمك باحترام!
غمّضي أكثر.. وشوفي عاشقين
يشبهون اثنين معنا.. بالتمام!
فتحي بشويش.. لا لا تهمسين
اسمعيني: سكّر (القاتوه) نام!
يوم غبتي خلف رمشك لحظتين
كان ليل (الطاولة) عشرين عام
طالعيني بس، وانتي تدركين
كيف هام وكيف نام وكيف قام!!!
يووه! لحظة اصبري.. لا تنزعين
عن هدية عاشقك كل اللثام:
تستحي منك، ومثلك، لو يبين..
بعضها فجأة وهي بين الأنام!
أول اقري ما كتبته من حنين..
يشبه لـ طفلة تمادت في الغرام!
هي قصيدة تشبهك لحظة تجين
جت كذا تختال.. ممشوقة قوام!
أيه عاد الحين.. ممكن تفتحين
والهدية جد ما فيها كلام!!
جبت لك.. وش جبت؟ وش تتوقعين؟
أووه يالله جاوبي، وش: ياسلام!
لا غلط! حتى مقاسك، تعرفين
دايم أصلا ما يجي قد المقام!!
مشكلة خصرك هي الجهل المبين!
ما درى انه فيك يعلن: انقسام!
ما عرفتي!، زين ليتك تصبرين
اسمعي قصة نصر عقب انهزام!
كان ياما كان خايف من سنين
كان يرجف وسط قلبه ما يلام..
كان ضايق، كان مهموم وحزين
كان واحد بس تشوفيه زحام!!
باب قلبه: دق فجأة دقتين
خاف أكثر يوم فتّح في الظلام!
قام يمشي، كيف يفتح؟! قال مين؟
قالت: افتح جيت أوصلك سلام
من فتح، قالت: أبدخل، قال: وين؟!
قالت: ابعد عن طريقي جيت أنام!
غمضت، نامت، وبس من ساعتين
فتحت بشويش من عز المنام!!
لا وربي، كيف أمزح! تمزحين؟
ذي حياتي مرت مْرور الكرام!
الهدية! يووووه.. انتي تذكرين؟!!
اتركينا الحين فـ آخر انسجام!
والله أمزح، دوك هذي علبتين
علبتي للخلف، وانتي.. للأمام!
افتحي هذي،.. دقيقة!، كلمتين:
ما علي ان طارت اسراب الحمام!!
صدق حلوة؟ لا يا عمري حرف (ع)
حول قلب الحب!.. من نفس النظام
ايه والله!، صار شمعي بين بين!
ذاب بعضه، بس عادي، مستهام!
انتي بس طلي على الشمع وْ يزين
طلتك من فوق.. يفهمها: قيام!
حتى لو اليوم يومي!، تفهمين؟!
قلت لك: هـ العيد عيدك والسلام!
تنفخين الشمع يعني تنفخين!!
أف منك تتعبيني بالكلام!!!
(أف) منك: ما تطفي شمعتين!
(أف) منك: نور، وسنيني ظلام
كان انتظرتي!
.. كنت ابرجع!،
رحت ابجمع..
ما تركنا من طفولتنا.. وابرجع!،
كنت ابسرع في الرجوع!!
ما صبرتي..
ما قدرتي تصبرين؟!!
تذكرين:
كيف كنا نحتفل!..
في عيدنا ما به شموع،
ما به سنين!
كنا ثلاث أطفال..
انتي وانا وانتي
.. كان الزمن موّال،
كان العمر خلخال..
يرقص بركض أيامنا.
وأيامنا.. نجري وهي قدامنا.. أقدامنا!
وش يومنا.. وش شهرنا.. وش عامنا!
الا ثلاث أقفال،
يوم كنا نحتفل، ما تنقفل!!
تذكرين!
ليتك صبرتي،..
ليه رحتي تكبرين؟!
ليه رحتي تكبرين!
كان انتظرتي!
صرت أنا وحدي طفل..وانتي كبرتي!!!
يا ويش ابكتب بس محتاج للمسح
ما عاد أبي اكتب ولا اسمع ولا أقرا
السالفة من غير تفصيل أو شرح
أعطي الزمن يمناي ويمد يسرى!
محتار!
دام الكبار: صغار
دام الصغار: كْبار
من وزع الأدوار!؟
ياطفلتي وينك؟
ما في المكان كْبار!
ما في الزمان صْغار!!
يا طفلتي وينك..
وينك.. أشمك وين؟!
تسمعين؟!
في عيدنا ما به دموع
.. ما به حنين!
ما به سوى حنا
صرنا ثلاث أزهار
انتي وانا وانتي
لا تقطفين..
لا تقطفي ضعفي!
لا تقطفي ثنتين!..
لا تقطفي «ضِعفي»!
لا تكبرين!
كان الزمان سْوار
في معصمك ساعة
في ساعتي أعمار
صار العمر أقمار..
تعكس شعاع نْجومنا
ونجومنا.. تستر بياض قلوبنا.. بهدومنا!
وش عامنا.. وش شهرنا.. وش يومنا!!
الا ثلاث أنوار
دام حنا نختفي .. ما تنطفي!!!
رغم تاريخ الطعون المنحفر في ظهري
رغم زلات الطريق اللي مشته أقدامي
قمت في كامل شموخي جيت أقدم عذري
للمبادئ، للحبايب، للشعر، لأحلامي
الرحلة الأخيرة (برق الشمال)
الرحلة الأخيرة (برق الشمال) 
النمط الخطي
