أنا والحظ

سرى ليلي وأنا وحدي سهيري =لذيذ النوم ما عانق نظيري

اصارع حيث نوم الليل راحه =وارى المقسوم ما عنّه مطيري

كثير الناس تسهر من عناها =وانا فرح ومسعدني بشيري

لفاني هاتف سلا فوادي =وانا اضمر هل يصير أو ما يصيري

شكرت الحظ وأنا كنت ألومه =تسنع واعتدل واشفى ضميري

وكم عانيت من وقتي ومنّه =خشيري كم حصل لي من خشيري

يريحني بعض لوقات وافرح =والى فزّيت عرقل لي مسيري

وانا مانيب عجل في قراري =ولا اطاوع عذول ولا مشيري

قنوع بما قسمه الله واساله =يقدّيني على اللي فيه خيري

بفضل الله قعد حظ رجيته =كما رجوى عقيمٍ للغريري

زهمته يعتدل وابدى سروره =وبان له السراب من الغديري

وعزّمنا أنا وياه نرحل =واحدّد ما تبقى من مصيري

وأنا ما أقوى ولا أحب الموادع =وقلبي من عنى الفرقا ضريري

ولكن طالت المدة وروحي =رهينة في سرابٍ مستديري

سراب بس قاعة فيه راحه =شموخ وعز واخطار وسعيري

وأنا هذا غرامي بس نفسي =عصت لا تستمع لشوار غيري

واحب ابني الصراحة بالصراحه =وأعيش بعز لو فرشي حصيري

وعذروبي على أني دوم واضح =ولأني بتبع الراي العسيري

وهلا يا هاتف سلا فوادي =عدد ما عانق النوم النظيري