شئ لا يقبل إضافه !!!!

تايهٍ وحدي خلاوي وجد من مثلي سواته
قصتي مثل الخيال .. ويمكن اقرب للخرافه

الله اكبر يازمانٍ فات واتعبني فواته
ياحسافه ياخساره .. ياخساره ياحسافه

مابقى لي غير حزنه مابقى إلاّ ذكرياته
آآه ياقل الفؤاد .. وآآه ياكثر إنتزافه

أعترف إنّي فقدت الغالي اللي ياغلاته
واعترف إنّي أحبه .. وان قلبي مايعافه

ليتني أملك على بعده جلاده وإستماته
مادريت ان بعده أصعب من مجابه ما أخافه

كل مابه يجذبك من حد سهله لا سراته
والله إتجنّ العيون جنون يالولا عفافه

ظاهره طاهر وينبّي عن طهوره في نواته
والوداد بطبعه الفطري ولا جت بالكلافه

وأعذب من الماء على فمٍ لسانه في لهاته
وأكرم من الغيم وأصدق من عناوين الصحافه

اعترف إنّي هملته .. آآخ ياقلبي وقساته
واعترف إنّ (كبريائي) ذنبٍ وتم إقترافه

آآخ ياقلبٍ تعذب ماتهنّي في حياته
وآآخ .. يانهر العنا ياكم تربّعت بضفافه

ياعيون الخلق صدّي بالنظر يكفي شماته
ماني اول عاشقٍ يشكي .. ويدلي بإعترافه

هو صحيح إن كبرياء الشخص من اسمى صفاته
غير والله كل شي يزيد عن حده ؟.. ((سخافه))

لوزمنّا مثل .. فلم ..آعيد وانظر مجرياته؟؟؟
كان باعيده .. واقدم عذر قلبي وانكسافه

وكان اخلّي كبريائي .. وأعترف له في حلااته
وكان أقول .. إني احبه حب ..ماعاشه وشافه

بس كل شيٍ تهدّم .. واختفى اللي .. ياغلاته
واعتلا حزني وأصبح (شئ لا يقبل إضافه