حفل قبيلة جهينة لشمر بمدينة جدة .... بالصور !!

إعداد ما هل المطر من سحايبه=و إعداد ما ذع النسيم بهبايبه
يا مرحبا ترحيب بأغلى مناسبة=ترحيبة اللي زايرينه قرايبه
بإسم الرفاقه مرحبا و ألف مرحبا=إعداد ما خط القلم في كتايبه
يا مرحبا باللي لفونا زيارة=عنوانها كلن يشاهد حبايبه
لو ما الصداقة و الوفا و المحبة=كلن على كيفه يدّرج ركايبه
أصل التواصل بين الإسلام سنة=و بين الرفاقه حق في كل نايبه
أبو زايد و من معه يا هلا بهم=بحضورهم كل الهبايب طايبه
ربعٍ لنا ذخرٍ بوقت النوايب=لا جاء النهار اللي تولع شبايبه
قوماً ليا صار الطلب نعتزي بهم=يوم الزمان اللي كثير غرايبه
و خوالهم شمر هل الطيب و الوفا=ريف الضيوف و كلمة الحق صايبه
شمر سنام المجد بين القبايل=صديقهم ما يشتكي من غلايبه
شمر ربيع الجار و الضيف و الخوي=لا قام كلٍ يفتخر في نسايبه
شمر خوال أهل الوفا مرقب العلا=و الطيب فيه رجال تدفع ضرايبه
تشريفهم تاجاً على وسق روسنا=بالمحفل اللي ما تشوبه شوايبه
أهلا هلاباللي تشرف و زارنا=في ساعةٍ فيها الشياطين غايبه
باللي لفانا من جميع القبايل=يا مرحبا باللي لفت به نجايبه
عند الرجال أهل الكرم و المروة=جهنان لا حل الزمان بصعايبه
اللي دعوكم يوم جوكم زيارة=كلٍ على العليا موصيه شايبه
جهنان للزاير مثل وابل المطر=ما يردهم سوق الغلا عن جلايبه
من غير قاصر في جميع القبايل=كلٍ على حقوقه قوية طلايبه
هذا و أنا شاعر على قد عرفي=ماني بجايب شي ما الله جايبه
شاعر و أعبّر عن مفاخر قبايل=في ذا الزمان اللي كثيرة عجايبه
و ختامها صلوا على صفوة البشر=و الشكر للي ما حصينا وهايبه

بديت بإسم المطِّلِع عن ما نكنه بالصدر=الواحد اللي رافع السبع الشداد بلا عمود
و صلى الله و سلم على المبعوث رحمة للبشر=شفيعنا في يوم فيه نقوم من تحت اللحود
من بعدها يا مرحبا ترحيب غالي معتبر=بإسم جهينة عزوتي ربعي عريبين الجدود
بشيوخ شمر مرحبا منا تراحيب المطر=من مزنةٍ براقها يطفي ظماء عطش الكبود
تباشرتبه كل ديرة يوم خُرّج من بحر=و أرخت ثعوله فوق خدان الصحاري و النفود
و ما فيه وادي غير من عاليه بالسيل إنحدر=و السيل تسمع له هدير و هاطل الماطر يزود
و الأرض بعد إسبوع صارت كلها بساطٍ خضر=و تفوح من ريضانها ريح البختري و الورود
أهلاً هلا يا مرحبا باللي لهم شان و قدر=شيوخ شمر مضرب الأمثال في ماقف وجود
شمر لهم تاريخ ثابت ما يغيره الدهر=العزوة اللي بالفعول الغانمة ترقى سنود
أهل الكرم في عصرنا هذا و في سابق عصر=الجود يا شمر توارثتوه من ورث الجدود
ميقافكم مشهود يوم الناس في بيوت الشعر=من عهد ماضي لين هذا العصر و العالم شهود
قومٍ فعايلكم تفوق الوصف و تفوق الحصر=و لا يجحد أفعال الرجال ألا رجل منكر جحود
و أقول يا شيوخ الطنايا كلمةٍ بالمختصر=أقولها كلمة صريحة ما تقيدها الحدود
أقسم برب البيت يا شمر يكفيكم فخر=و إنتم خوال أعظم رجل موجود في هذا الوجود
خوال صقرٍ له بعال المجد يا شمر وكر=الملك عبدالله ولد عبدالعزيز ابن سعود
صقر العروبة يا لعله من طويلين العمر=الله يحفظه سيدي و العود في عين الحسود
في قلوبنا حبه كبر كبر كبر كبر كبر=حتى غدى حبه مكبلنا تكبل بالقيود
قيود نتلذذ بها مثل التلذذ بالثمر=و نعاهده بالحب و الإخلاص ما نخون العهود
الله يحي كل من جانا و بالمحفل حضر=ترحيبةٍ مثل القراح العذب من نبع العدود
بإسم القبيلة كلها ترحيب و حروفه درر=والله يبارك فالشيوخ و من بذل معهم جهود
و حنا جهينة عندنا تلقى اليقين من الخبر=ملجأ الدخيل و للوطن في ظل عبدالله جنود
و ختامها يا مرحبا منا تراحيب المطر=بإسم جهينة عزوتي ربعي عريبين الجدود
و صلى الله و سلم على المبعوث رحمة للبشر=شيفعنا في يوم فيه نقوم من تحت اللحود

من دار حاتم طي شمر هلَّ الكار=أهل العلوم الطيبات الثمينه
اللي جبلها دوم هلاّ بالأنوار=بإسم هلا ينوب عن ساكنينه
ما هو دعاية رمز للطيب و شعار=يشهد لنا التاريخ و متريخينه
متعشيٍ ذيب الخلا عقب الأسحار=من شمرٍ كل الملا خابرينه
و راعي الحيسه شمري علمها أفخار=من غير شمر مجدها ذاكرينه
و خمسة عشر يومٍ مع الدو عبار=خوينا بأمتاننا ناقلينه
و مع جارنا دومٍ على الهم صبّار=يذبح ولدنا شيمةٍ معتزينه
لو أبـ أعد أفخار ربعي بها أحتار=زيد السويدي شمرٍ عاذرينه
يا شمرٍ من فوق جمسٍ و فكس آر=نبي لجدة دربنا بالمدينه
دعوة كرم لازم بها اليوم مشوار=شمر و داعينه قبايل جهينه
أهل الوفا و الطيب من ماض الأدوار=اللي لهم شيخٍ و يطلق سجينه
طبيعته دايم كما الوالد البار=ابن غنيم الليث طيبه خزينه
والله ما قلته مجامل و قمّار=من لا يقول الصدق ينقال شينه
و من يجحد المعروف عارٍ بأثر عار=شمر هلّ المعروف ما هي كبينه
فحيمان طيبه فوق في راس سنجار=ابن الحجوري مسجله في جبينه
أطلق سجينٍ حج للبيت زوار=من بعد حادث صار له بالمدينه
ما به معرفة لا قريبٍ و لا جار=يبي الوفا عساه يسلم جنينه
الطيب دربه فوق ماكر للأحرار=و ألا الردى بس إنجضع نوم عينه
ناسٍ تحسب الطيب مليون دولار=في شاشة الأسهم عيونه خدينه
نسى حقوق الله على المال سهار=عند المؤشر بس تسمع ونينه
نبي لأبو نادر على سيف الأبحار=محمد و ربعه شوفنا محترينه
يا عايد الغانم معك ما بها أعذار=يا لأأسلمي ثنتين ما شفت زينه
عمره و صلة راعي الطيب و الكار=الله ييسر دربنا واصلينه
حنا بخير و حكمنا واف الأشبار=الدولة اللي عدلهم موازنينه
الشعب و الدولة كما الساس و جدار=بإذن الولي تبقى حصونٍ حصينه
اللي لهم دستور قرآن مختار=يخزى بها الخاين و راع الضغينه
من عاف للجنة يلاقي بها النار=السيف عدل و نخلةٍ مرتجينه
إمامنا عادل كما الوالد البار=كلامه المنصور لمبايعينه
خاطب بها شعبه كبيرين و صغار=الشعب كله كلمته سامعينه
و اللي يشق الصف خاين و غدار=يا لعل أبو متعب وليك يعينه
من حولنا نشوف وش صار وش صار=اللي شعةبه دوم تطحن حزينه
اللي بها سادوا من الناس فجار=طوايفٍ من كل شكلٍ و عينه
كلٍ جمع له شلةٍ حولها أنصار=ضعيفها مقهور يرجي سمينه
نشوف في غزة بها الدم نثار=و بغداد أشوفه طاح هم غبينه
و لبنان ما له ريسٍ راح بأخطار=ليه العرب في وسطهم خاسرينه
أحسن أقول الليل نختم بالأشعار=تحيةٍ من زيد يا سامعينه

في ليلةٍ تشبه لليلة عيد الأضحى و رمضان=يوم إن كلن منبسط في فرحة العيد السعيد
ليلة لها التاريخ يشهد بالزمان و بالمكان=و يسمع اللي بها من رزقه الله بالعمر المديد
ليلة و لا شي مثلها ليلة على مر الزمان=يوم إجتماع أهل الوفا و الطيب و الراي السديد
و لي الشرف لا جيت أرحب بإسم خطلين اليمان=ربعي جهينة عزوة ابن غنيم فاليوم الشديد
يا مرحبا بإسم الرجال اللي لها فالوقت شان=نسل الصحابة الخالدة عقبة و خالد بن يزيد
و إعداد من هو طاف بالكعبة و لبى و إستعان=بالواحد الفرد الصمد الحي خلاق العبيد
بضيوفنا قوم الوفا و أهل الكرم و أهل الأمان=شمر و لنك قلت شمر يرضخ الراس العنيد
قوم السناعيس الثقات الحاضر و لن قلت كان=وقفاتهم وقفة صلاح الدين و أيضا ابن الوليد
يا ضيوفنا جسر الوفا مبني على عز و ضمان=ما يوم شابه شايبة و ألا عبر علمٍ مكيد
حنا سوا شمر مع جهينة على عسر و ليان=لن كان قامت من قريب لن كان قامت من بعيد
في ظل أبو متعب حبيب الشعب حامي هالكيان=تاج الوفا رمز الكرم و الطيب و المجد التليد
نبقى على عز و معزة شعب واحد كالخوان=و الله يحفظ ملوكنا و الطيبة تبقى رصيد
و ختامها صلوا على اللي مده الله بالبيان=نبينا اللي بلّغ الأمة على العلم الرشيد