غلطان انا في كل الاحوال غلطـان

حسّي بلوعات الليالـي والاحـزان
بعديـن حسـي بالهـوى لا بغيتـي



وش به يهمك لو يقولون زعـلان !؟
لو فيك ذرّه من غـلا .. ماجفيتـي



ياللي تقولين الخطـأ زلـة لسـان
في زحمـة الايـام ليـه اختفيتـي



خطاي وان جا مدري الذنب وش كان
ليه انتهـى ذاك الغـلا وانتهيتـي ؟


وقفت في وجه الزمن قدر الامكـان
وانتي جنح فيك الخيال .. وغفيتـي



غلطان انا في كل الاحوال غلطـان
اسرجت لك خيل القصيـد وسريتـي

جيتي وقلت الجرح يوم اقبلت هـان
واثرك على الجرح القديم ارتكيتي !!



قلتي لي ان الحـب لابـد ينصـان
واليـوم ماكنـك دقايـق هويتـي !



شافوك حساد الهوى شوف الاعيان
يومك على رجـم القصيـده رقيتـي



العام لك طاري بقلبي ولـك شـان
واليوم احـس بغلطتـي لا طريتـي



وان قدّر المولى وعشتي بحرمـان
ومن حرّ لوعـات التجافـي بكيتـي



تذكري قلـبٍ لـه سنيـن شفقـان
شوفي بحقـه ياكثـر مـا خطيتـي



كل القصيد اللي اقوله علـى شـان
تهزك الذكرى عقـب مـا نسيتـي