أبو زيد وربعه الهلالية قصصهم كثيرة، سجلتها الكتب وحفظها الناس،
ولكنها لم تخل من الزيادات والمبالغات والتدليس ومن استغل بني هلال
وقوتهم المعروفة في اختلاق القصص عليهم، وهنا قصة أبو زيد
وهي جزء من تاريخ الهلالية، وقصة أبو زيد هنا ملخصة من كم كتاب
ومن ما سمعناه من شيباننا، وقد حذفت بعض الأبيات إذا كانت القصيدة
طويلة واكتفيت بالشاهد منها، ومن أراد القصة كاملة بالتفاصيل
فليرجع للأصل أو ليبحث عنها في الكتب.
في البدايه ابي اتكلم عن قصة الحب اللي حصلت بين أبو زيد الهلالي
واسمه الحقيقي (سلامه) وعليا واسمها كامل
عليا بنت الشيخ جابر العبيدي القحطاني
أول أحداث القصه يوم شاف أبو زيد عليا اعجب فيها وجن جنونه
انهبل جمال وجسم وبنت شيخ قال في نفسه ماخذها ماخذها بس العقبه
الوحيده قدامه ان شيخ بني هلال مانع شباب بني هلال ما ياخذون
الا من بنات بني هلال (وطبعا عليا بنت الشيخ جابر من عبيدة من قحطان )
راح لأميرهم (الهلالية) واسمه حسن بن سرحان وطلب منه يسمح له
يتزوج من عليا فرفض الأمير وأصر أبو زيد ألا أن يتزوجها
وقال للأمير أنت بس شفها وتعذرني رفض الأمير وارسل ناس يشوفونها
ويوصفونها له جوه المراسيل ولا مدحوها له يقولون نحيفه ولا هي على
وصف أبو زيد رفض الأمير مره ثانيه وكرر عليه أبو زيد وطلبه انه
يروح يشوفها بعد كثر الإلحاح قال الأمير بينه وبين نفسه ليه ما اروح
اشوف هاللي خذت قلب أبو زيد وأبو زيد معروف عنه انه فارس
ولا يفكر في الزواج ولا يفكر انه يجي له عيال ابداً
أبو زيد كان يوصف عليا عند الأمير حسن بن سرحان يقول عليا
إذا وقفت من أوسط البنات بالطول وإذا جلست تكون أطولهن
( يقصد بكلامه أن فخوذها كبار إذا جلست ترفعها )
راح الأمير يشوفها واخذ معه واحد اسمه أبو العلا وكان الأمير
راكب ناقة يوم شافها انبهر من جمالها ما يدري يمشي في أي اتجاه
نزل من ناقته وراح يمشي ويردد قصيده يقول فيها :
ابا العلا قدلي مع الدرب ناقتي=
بحسناك والا ناد لي من يقودها
يقولون لي عليا نشاش دقاقـه=
وانا اقول ريان من الغي عودها
ان وقفت دق العسيلي بوركهـا=
وان دنقت ما رده الا نهودهـا
قولوا لطراد الهوى يطرد الهوى=
انا كفيلك عن بلاوي حسودها
قولوا لأبو زيد ياخذها
العسيلي هو نوع من الجلد المقوى على شكل حزام وسيع على شكل
حجل في الوسط ويقصد بالبيت ان وسطها ضامر مافيه شي يرد الحزام
في الأخير سمح له وتزوجها أبو زيد .
وكان معروف عن بني هلال انهم أهل طرب ورقص وفلة حجاج بس
ما فيه شي يدوم لأنه جاهم أسبوع أمطار الليل والنهار تصب عليهم
ما قدروا يرقصون ولا ياخذون حريتهم من المطر قال لهم واحد
( ويقال انها عجوز في اغلب الروايات ) إذا تبون المطر يوقف
اسلخوا لكم بقره وهي حيه ويوقف المطر طبعاً هم ما صدقوا
خبر سووا اللي قالته العجوز وفعلاً وقف المطر والوقفه الواقفه!
اخذوا ثمان سنين ما جاهم ولا قطره ولا هب عليهم الهبوب
ومن المواقف اللي صارت بسبب الجفاف ان أبو زيد كان هو وواحد
اسمه عزيز ابن خاله رايحين يسقون إبلهم ونزل عزيز في البير
يملا الدلو لخاله أبو زيد ( وقصة عزيز بن معروفة على مختلف الروايات
وملخصها أن أبا زيد وقع على أخته والتي نامت متعمدة في فراش
زوجته لأن أبوزيد كان يعزل ولا يبغى يجي له ولد ويصير أطيب
وأشجع منه، لكن أخته حملت منه بعد خطة سوتها إلى آخر القصة )
نزل عزيز في البير مع نزوله قرصته حيه و (ون) منها وسمعه أبو زيد وقال له:
سمعت منك يا فتى الجود ونه=
عساك منها يا فتى الجود سالم
قال عزيز :
انـا سالـم منهـا ولانـي بسالـم=
والراس ما تطوى عليـه الغمايـم
أنا سالم لو ما ازرق الناب عضني=
ضربنـي بنابـه واتقـا فالرقايـم
وانا خايف يا خـال هـذي منيتـي=
ومن رافقك يا خال مـا رد سالـم
وحلفت أنا يا خال لروي ركايبك=
واخلي الماء من على الحوض عايم
قال أبو زيد :
يا وليّد قم خم الرشا واحتزم به=
خل اظهرك عن بير فيه الصمايم
ملا عزيز الدلو وطلعه خاله من البير ويوم شاف أبو زيد ان
الموت جا عزيز( ون) أبو زيد ويوم سمعه عزيز قال:
يا خال خل الـدوح والنـوح خلـه=
واعمل بقبري يا عطيب الضرايـب
خل القبر في راس عيطـاً طويلـه=
وسيفي ورمحي حطهن لي نصايب
أغـدي بنـات الهلاليـه يجنـنـي=
يجذ على قبري بـروس الذوايـب
وداعتـك يـا خـال ورعٍ صغيـرٍ=
يلعب مع الصبيـان وأبوه غايـب
احذرك انا يا خال عن ضربه العصا=
أو نهـرةٍ تـودع قليبـه حطايـب
وقولوا لبنت امي تغطى وتستحـي=
ليا جولها الخطاب فـوق النجايـب
وقولواا لبنت العـم ترحـل لأهلهـا=
حرم عليها اليوم شـوف الحبايـب
(بنت العم يقصد بها زوجته) مات عزيز ودفنه أبو زيد مثل ما وصاه
وصب الدلو اللي طلعه عزيز على قبره وقال أبو زيد فيه:
دفقت على قبر الهلالـي قربتـه=
وخليتها تسق الرياض المجـادب
وحطيت على قبر الهلالي جوخته=
وخليتها تـذرا عليهـا الهبايـب
وحطيت على قبر الهلالي فتخته=
في ما قع يشوفها كـل صاحـب
وعقلت على قبر الهلالي بكرتـه=
وخليتها تعتب حـوالا النصايـب
أستمر الجفاف ثمان سنوات وبني هلال يشدون من مكان وينزلون في مكان
يدورون الماء ويحفرون حتى في روس الجبال وكل مكان يشدون منه يدفنون
فيه من موتاهم من العطش ولهم اثار كثيره في نجد والجنوب ومازالت
ابارهم موجوده في كثير من مناطق المملكه وهذا من اكبر الأدلة على انه
كان لهم وجود حقيقي وان القصص والكلام عنهم ليس من الأساطير
ولكن استغلت شخصياتهم في كثير من القصص
ومن ما قيل بسبب الجفاف ما قاله الأمير حسن بن سرحان:
ثمان سنين ما هوا نجـد قطـره=
ولا زلزل الرعد الرزين وزار
ولاهبت الغرى ولاهبة الصبـا=
ولا طار من اشعاف البكار غبار
حفرت فالبيـدا ثمانيـن قامـه=
ودورت انا الجم الغزير وغـار
يانجد وان طاح الحيا فازعجيلنا=
وشبي لنا براس المقوزي نـار
لك الله صبيان النشاما تغيـروا=
بنابٍ ضحوكٍ يعجـب الخطـار
بعد ثمان سنوات من الجفاف ضاعت الحيله عليهم ما فيه أي شي لرعي
حلالهم ولا فيه أي شي يشربون منه قال الأمير حسن لأبو زيد نبيك
تروح تعس ديار تونس وتجيب الأخبار منها لأنهم سمعوا أن فيها خير
وان أرضها مليئه الخضره والعشب وتشوف فيها حيا والا لا.
وكان اختياره لانه يعرف ان أبو زيد اقدر الناس على السفر لتونس
وكان السفر لها يستغرق ثلاثة أشهر ( وكان اختبر أبو زيد يوم انه شد
شدة طويلة وابو زيد ما كان يراوح في الركوب )
بعد محاولات واقناع وافق أبو زيد انه يروح بس اشترط انه يرسل
معه عيال الأمير حسن وهم يحيى ومرعي ويونس
أولا لأنهم فرسان وثاني لأنه يبي يشوف إذا الموضوع مهم عند الأمير
ولا يهم بمخاطرة أبو زيد فهو بيوافق يضحي بعياله ويخاطر بهم لان
الطلب ما هو هين وافق الأمير على شرط أبو زيد وجهز عياله من كل شي
يحتاجونه وكان طريقهم مع الحره في الحجاز وذلك مذكور في قصيده
أبوزيد يقول فيها :
سرنا مع الحرات تسعين ليله=
نقود الطوعات خلف الجهايم
توجه أبو زيد وعيال الأمير لتونس وفي طريقهم مروا على عامر الخفاجي
في العراق واللي أيدهم ووعدهم انه يوقف معهم إذا احتاجوه أو احتاجوا
منه شي وتوجهوا من عنده باتجاه تونس واللي كانت فيها قبيلة بني قابس
وصلوا لتونس وكان حاكمها يقال له خليفة الزناتي
أكرمهم الزناتي أحسن إكرام مع انه ما كان مرتاح لهم لأنه كان حالم
له حلم مخوفه وشايفٍ فيه ان جايهم سحابه من الشرق وتمطر عيهم شوك
ويوم وصل أبو زيد واللي معه لديار بني قابس وعرف انهم جايين من
ديار الشرق قال في نفسه أكيد ان لهم علاقه بحلمي وان شي بيصير لي
منهم وقال ليه انا ما احبسهم لين اتحقق من صحة كلامهم وبعدين اقرر
اطلق صراحهم وامر بحبسهم والتحقيق معهم
سألوهم من اين أنتم جايين ووين رايحين قالوا حنا من ديار عامر
وراجعين من الحج ومر بنا الطريق على دياركم
بس الكلام ما كان مقنع ابد ولافيه شي من الصحه
ما صدقوهم وامروا بحبسهم
وبعد مده امر بنقلهم من السجن لقبو في قصر الزناتي
لانه ما كان متطمن لهم ابد ومازال يحس ان لهم علاقه بالحلم
الزناتي كان له بنت واسمها سعدى وتلقب بالصفيرا وكانت كاهنه
تخط على الرمل وتكهن ومن ما شافته بالخط على الارض انهم بيغزون
وبيجيهم ناس يذبحون أبوها وان اللي بيقتل أبوها واحد اسمه ذياب
جتهم سعدى وسالتهم وقالوا لها نفس الكلام انهم حجاج
ضحكت عليهم وقالت يالكذابين معي علمكم انكم أبو زيد ويحيى
ومرعي ويونس عيال الأمير حسن بن سرحان ما قدروا ينكرون واعترفوا لها
وطلبوا منها انها تساعدهم وقالت أساعدكم بس بشرط انكم إذا غزيتوا
علينا فيه واحد اسمه ذياب ( ولد اخت أبو زيد) بيذبح أبوي إذا عاهدتوني
انكم تزوجونيه اساعدكم قالوا ان ولد اخت أبو زيد صغير ولهوب فارس ولاعمره
شارك في حرب لانه وقتها كان عمره صغير على خوض الحروب
وما كان له أي فعل وكان أبوه خواف
قالت صاحب الاسم ذا بيذبح أبوي وتزوجونيه سواء كان ولد اخت أبو زيد
او غيره وافقوا على شرطها وقالت انا بروح لبوي وبقول انك عبد
( تقصد أبو زيد لانه كان أصلع من لبس الدروع واسود من الشمس )
وبقول لأبوي ان سجن العبد عيب اترك الاحرار الثلاثه في السجن
وفك العبد واكدت لهم انها بتساعدهم وعاهدتهم على ان أبو زيد بيطلع باي طريقه
وقالت لأبو زيد اني إذا قدرت اطلعك لا تقول لاحد انك أبو زيد ثم ما يفكك
ونبهتته من حيل أبوها وانه ما راح يفكه كذا لانها عارفه ان أبوه ما تطمن
لهم ابد وإذا اكتشفوا انك ما أنت عبد انك برجع للسجن ويمكن اتورط معك
راحت لأبوها وقالت له يفك العبد وحاولت انها تقنعه انه عبد وبعد محاولات
اقنعته انه يفكه ويراقبه ويتاكد انه عبد
وافق المسكين ما عرف حيلة بنته عليه
ً لكنه ما وافق بفكه كذا أمر اشجع فرسان بني قابس ويقال له العلام
يراقب كل تحركاته ويوم راحت تفكه نبهته وقالت له عن حيلة أبوها وانه مراقب
وكانت حيلة الزناتي انه قال حطوا العبد ( يقصد أبوزيد ) عند القدور
وخلوه يطبخ وأنت راقبه يالعلام وخلوا الخيل تعرض من قدامه والفرسان
يلعبون ان شفت العبد طنش القدور وراح اهتمامه مع الخيل اعرف انه
فارس واقطع راسه على طول ولا تناقشه
عرضت الخيل قدام أبو زيد ويوم شاف الخيل والفرسان نسي نفسه
وانطنخ معها فارس وشاف الخيل والفرسان ولا له في شغلة القدور
جاه العلام وسأله قبل ما يقطع راسه من أنت شاف أبوزيد انه تورط ولا له غير
الاعتراف قال أبو زيد اقول وتعاهدني ما تذبحني قال العلام اعاهدك قال أنا أبو زيد
أبــو زيـــد الــهــلالــي ... مـلـخـص القصة
أبــو زيـــد الــهــلالــي ... مـلـخـص القصة 
النمط الخطي
