لوم و مشاريه

بين العرب عشنا ولابـه مسـاواه=ياللي تساوي بالزحـول البهابيـه

بعض العرب ودّك ببعـده وفرقـاه=لو ان بعده ينشرى كـان تشريـه

وبعض العرب ودك بقربه ولامـاه=لوفرقتّكـم سـود الايـام تغليـه

لاحتجت له في حزة العسر تلقـاه=وليا نخـاك لحاجتـه قلـت لبيـه

لنّه على الطالات نفسـه مضـرّاه=وابوه من صغره عليهـا مربّيـه

شروى الخوي اللي ينومس مخاواه=اللي ينومسنـي بذكـره وطاريـه

ولاّ الثياب ابها رياجيـل واشبـاه=شياً بيـان وشـي ربـي مخفيّـه

كم واحدٍ ينفخ على الناس علبـاه=لوهو مايدري وين ربـي موديـه

وكم واحدٍ له فالمجالـس مبابـاه=واليا سمعته قلـت لاوالله البيـه!

والياحداك الله على بحثـة اقصـاه=تلقاه هرجٍ صامـل الكـذب قافيـه

ازوااال بثيـاب الاوادم مخـفّـاه=وكلٍ تزيّن لـه ظنونـه مساعيـه

والرابح اللي عنهم الخالق اغنـاه=عرضه ستير وواجبـه مايخليـه

يعز نفسـه ليـن تبـرك مطايـــــاه=ولغيـر ربـه مايكثّـر مشاكـيـــه

ومن لااستطاع يعز نفسه بيمنـاه=لايلحق ادنى الربع لوم ومشاريـه

لومه على نفسه اليا حسّب اخطـاه=ولابد قلبه مـن منامـه يصحيــــــه

واللي يخاوي الرجل حشمه لمخباه=والله لو اجلس لحالي مـا اخاويــــه

انا آزن الرجّّال من يوم مـا القـاه=وانزّلـه فالمنـزل اللـي يكافيـه

اما امدحه لاوحيت ذكره وطريـاه=ولاّ اطلب الله لايجينـي ولا اجيـه

ولاكل من يصخـر بيـوتٍ مقفّـاه=ودي بمعرفته وممشـى مماشيـه

احدٍ اليا نادانـي اسمـع منـاداه=واحدٍ يناديني لكن ما التفـت فيـه