بعد صلاة الفجر .. توجهت لسوق السمك ... حيث أنه مرت فترة طويلة لم آكل سمك رغم أننا في بلد ساحلي
هناك ... وجدت أحد الأصدقاء .. وسرعان ما توجهت نحوه وسلمت عليه
حيا الله ابو فلان
حيا الله ابوعبدالمجيد .. جيت في وقتك
خير .. ويش عندك
ابد .. ويش عندي .. باشتري كرتون بطاطس !!!
ويش بيكون عندي يعني ... أكيد بشتري سمك .. اليوم عندي عزومة .. وطالبين مني سمك .. وطالما إنك خبير .. ابغاك تنقي لي سمك جديد
( هين يالخبير .. وانا حدي اقول للبائع قبل اشوفه .. احلف إنه جديد .. واتفلسف واسأل .. حق جده ولا الخليج ولا جيزان .. ولا سمك ينبع .. اسوي نفسي فاهم .. يروح يخاف ويقول الحقيقه )
قلت ولا يهمك .. أي نوع تبغى بالضبط ؟؟؟
ناجل للصيادية طبعا .. وشعور وبياض لأمور القلي
اشترينا بحوالي خمسمائة ريال سمك .. وقضينا وقت طويل في اختيار الطازج .. وقضينا فترة طويلة حتى تم تنظيف السمك
وأنا ماشي .. ناداني
تراك معزوم على الغدا .. وإياك تتأخر .. تعال بعد صلاة الجمعة على طول
سمك و مندي و باكستاني على الأعناق
بعد صلاة الجمعة .. توجهت لمنزل صاحبنا .. ممنيا نفسي بصيادية ما حصلت .. خاصة إذا كانت بالناجل .. وهو أغلى أنواع السمك .. والمفضل عندنا
دخلت المجلس .. وإذ به عدد من الضيوف لا بأس به .. ووقت الغدا .. فوجئت بأنه تيس مندي !!!!
صعقت بالطبع !!!
سألته .. وين الصيادية ؟؟؟
رد أحد الضيوف سريعا
شايف صاحبك ... ضحك علينا .. وعدنا بصيادية .. والحين يقول ما قدر يروح يشتري سمك .. وجاه ظرف طارئ .. ووعدنا بسمك الشهر الجاي
إنت إلي شوقتني .. لو قلت أم العيال تعبانه وما قدرت تطبخ ... كان مشي الموضوع عادي طالما الشغله فيها سر
أعوذ بالله .. ( لا تمارضوا فتمرضوا فتموتوا )
طيب .. هات السالفة
بشرط .. لا اسمع إنها صارت قصه .. المرة إلي فاتت بغيت تفضحني في قصة الـــ ... ووالله لولا إني احبك ما أعلمك
قلت ووالله إني احبك في الله أكثر ... ابشر .. إلا أن يشاء الله
ويش قصدك ؟؟؟
ابد .. ويش فيها لما أقول .. إلا ان يشاء الله .. أحكي
سمك و مندي و باكستاني على الأعناق
أما الناجل فقد انجلى بفضل الله
قال .. خرجت من السوق .. وانا رايح للبيت .. وافكر .. يبغالي اروح اسحب فلوس لجل اشتري سمن واشياء كثير .. وبعدين رحت افكر في الناجل كسمك غالي .. وحمدت الله على نعمه
فكرت في الناس إلي ما تقدر على ثمنه ... تمر وتشوفه وتسأل فقط عن سعره وتمر مرور الكرام ... وجاء في بالي قوله تعالى
( لن تنالوا البر حتى تنفقوا مما تحبون )
قلت في نفسي .. والله إني احب الناجل .. بكره إن شاء الله اشتري كمية .. واتصدق بيها
بعدين ... فكرت .. اليوم جمعه .. يوم عظيم .. يمكن غيري مشتهي سمك أكثر مني ومن ضيوفي
ياولد .. روح تصدق بيه .. يمكن إني الوحيد اليوم إلي أتصدق بسمك جديد وغالي ... نفسي والله أكون مميز عند الله عز وجل ... نفسي والله
لعل الله يسأل وهو العالم .. ماذا أراد عبدي ... فيقال وجهك الكريم ... فيقول .. اشهدوا ... لينظرن إلي نظرة ... وليعلمن أن وجهي هو لذة الناظرين
حينها اهتز كياني و قلت في نفسي .. والله يا رب ... لأنت أحب عندي من الأكل ... ومن ضيوفي ... ومن نفسي
ما مشيت شويه ... إلا والله غمرني شعور غريب بالسعادة وفرحت بفضل الله إنه سخرني لهذه الصدقة .. وانشرح صدري للصدقات
وأنا رايح للبيت للمرة الثانية .. قلت في نفسي .. حتى الشعور .. والله فيه ناس تتمناه .. لكن ما تلقاه .. بكره إن شاء الله .. اشتري كمية وأوزعها ... دايما الناس توزع فلوس .. ولا لحم .. خليني هالمرة موزع سمك
رجعت و قلت في نفسي .. اليوم جمعه .. أكثر الناس في البلد تاكل سمك .. خليني أقسم الشعور بين بيتين أيتام ... وماهي مشكلة ... والغدا نتصرف فيه .. ما حنموت لو ما أكلنا سمك اليوم
و قلت .. والله يا رب إني أحبك أكثر من نفسي ومن ضيوفي .. فزدني فيك حباً
رحت وزعته بين منزلين .. وقلت اخلي البياض للبيت .. والغدا نتصرف فيه ... أو حتى نسوي صيادية على البياض .. والحمدلله رب العالمين
سمك و مندي و باكستاني على الأعناق
وأما البياض فأجلاه البياض
عجبتني السالفة ... سألته .. كيف يعني ؟
ثالث مره وأنا متجه للبيت وفي شارعنا .. قلت في نفسي
زين إني تصدقت بالناجل والشعور .. وما بقي غير البياض .. اسأل الله أن يبيض وجهي ووالديّ في الآخرة
إلا وشوية ... قلت في نفسي .. وليه ما أتصدق بالبياض .. لعل ملك من الملائكة .. يدعو .. تصدق فلان بسمك بياض .. يسأل الله أن يبيض وجهه ووجوه والديه يوم القيامة
(يوم تبيض وجوه وتسود وجوه )
ما جات في بالي هالآية ... إلا ونزل الدمع من العين
لفيت ورجعت .. ناحية بيت اعرفه .. وتصدقت بالسمك الباقي
قلت الله يجزاك كل خير ... الحمدلله إلي يسر لك الخير
رجعت البيت سألتني أم العيال .. وين السمك ؟؟؟
قلت لها .. تصدقت بيه .. وقلت في نفس الوقت .. اليوم جايين ضيوف ومافي داعي توقفي في المطبخ طول اليوم .. ويكفي عليك شغل البيت
فرحت وقالت جزاك الله خير
قمت ... وقلت .. يادوب الحق
قال .. خير
يادوب الحق اكتب الموضوع قبل ما تطير القصة من راسي
اصلا أنا غلطان احكي لك حرف ولا اصدقك مرة ثانية .. أنا قلبي كان حاسس
طالعت فيه .. إياك تكره الخير للناس ... ريح نفسك ... سأنشره ولكن بعد فترة وليس الآن
( لئن يهدي الله بك رجلا واحد خير لك من حمر النعم )
...
سمك و مندي و باكستاني على الأعناق
دائما .. وأبدا حين أكتب عن الصدقات أو مواقف .. لا نلتفت لحجم المبلغ .. فمهما تصدقت .. فهناك من تصدق بأكثر منك .. ولا نبالي إن كان الشخص قد تصدق بلحم أو سمك .. أو حتى بريال ...فكلا على قدر إمكانياته وظروفه وقتها .. وربكم يبارك ... لكن نركز على أشياء .. قد لا تكون على البال أبدا
أشياء
فيها من الإيثار الكثير
صغيرة في حجمها
كبيرة في معانيها
قليل من يفعلها
تجعلنا نقول .. ليتنا كنا هذا الشخص
حين تكون مشغولا بذكر الله .. قلبك طاهر .. يفتح الله لك أعمال الخير في كل أمر .. و يستدرجك للخير وانت لا تدري
أذكر في أعد الأعوام ... حججت برفقة شخص احسبه والله حسيبه من أهل الصلاح ... حين رأى أهل الخير يوزعون الماء والطعام على الحجاج .. تحسر وحز في نفسه أنه لم يكن معه مال يكفي لينفق في سبيل الله
قام بالوقوف على أول جسر الجمرات .. وكلما رأى كسيحا أو شيخا طاعنا في السن .. حمله على أكتفاه حتى لا يتضرر من الازدحام .. ثم يتوجه به لرمي الجمرات ... وبعد فراغه ... ينزله بهدوء في آخر الجسر ... ثم يعود ويأخذ شخصا آخر
أقسم برب البيت المعمور والبحر المسجور والسقف المرفوع ... أني رأيت شيخا هرما أعتقد أنه من باكستان ... فرحا يضحك محمولا على كتفه ... وهو يرى نفسه من أقرب الناس للرمي ويدعو لصاحبنا
فمن لا يتمنى ذلك ؟؟؟
حين سألت صاحبنا
( ويش جاء في بالك وانت تحمل الحجاج على كتفك وخلف عنقك وأرجلهم على صدرك )
رد علي بأنه تذكر قوله تعالى
( وهم يحملون أوزارهم على ظهورهم ألا سآء ما يزرون )
ثم قال
آثرت أن أحمل هؤلاء ... لعل الله يجنبني أن أحمل أوزارا يوم القيامة
وكم من شاب يبحث عن أهل الضعف في الحج ثم يسألهم أن يرمي عنهم ... رحمة بهم ... لعل الله يرحمه
تقرب إلى الله يهيئ لك العمل الصالح .. والقول الصالح
ولو كنت أفقر الناس
ولو كنت اقل الناس علما
في الشارع ... في البيت ... في السوق .. ووالله لو كنت في الصحراء وحدك
سمك ومندي وباكستاني على الأعناق
سمك ومندي وباكستاني على الأعناق 
النمط الخطي
