اباغيّـر مفاهيـم النحـو والصـرف

على رتم العقـول اللـي تعالـج وضعهـا بهْبـال
سرى ليل القلوب اللـي تهـاوت فـي مساحاتـي

وانا ماعاد لي قلب ٍ ايلا من قـال , قـال وطـال
ولالي غيـر زفـرات القصيـد وطيـب هقواتـي

أتابع فيـك مفـرود القصايـد وافتخـر واخْتـال
وأحس احيان بحْروق الحـروف وحـر جمراتـي

أنا لو جيت لـك مجنـون قولـي فلسفـة عقـال
واجِبْري كسـر تنوينـي معـاك ابْرفـع ضمّاتـي

اباغيّـر مفاهيـم النحـو والصـرف والاهـمـال
وقانـون البلاغـه والعـروض ابْكـل كلمـاتـي

أبا اخلق نون للنّسوه , وبافتـح بـاب للإحـلال
وابـدّل جمعكـم مفـرد وبَارفـع كـل كسراتـي

أبا انصب مبتداك بْكاف وامسح منْه حرف الـدال
واحط الـلام فـي وسطـه يبيّـن سـر مأساتـي

ابا الْعن خامس الفاعل , وأغيّر صيغـة الافعـال
واحطه في خبر كـانَ , واجـدّد شكـل صفحاتـي

ابا الغي سيْبويه ابْحرفْ , واصْنع بالنّقاط اجيـال
وبَاشْطب طرْح أبو الأسود مـع خالـص تحياتـي

أبيك انتي اجابة منْ , وعطف الواو , واسم الحال
وابيك الفعل والفاعـل , وكـل أهـداف نظراتـي

أبيك انتي قواعد صرف , وحزم الجد واستهبـال
وابيك اعْقول تفكيري , وصوت الكـذب بسكاتـي

أبا اعقد مؤتمر قمه , وبافْـرض حظـر للتجـوال
وبَامْنع رجة ( امعمّر ) , من الغـاء إجْتماعاتـي

ابادعي قلبي وعقلي , وكل احساس صـال وجـال
واباجْمع كـل احزابـي , نقـرّر ماهـو آتـي :

بمـا أنّ الظـروف الآن , لاتسمـح بأيّـة حـال
بأي اجـراء روتينـي , علـى سائـر دويلاتـي

عليه الآن , فلْيعْلنْ , طوارىء والحمـول اثْقـال
ومنْك انتي , ايصير اول , ظهوري وانتصاراتـي

أبي كفْ , وهدبْ عينْ , ونقاوةْ قلب واستبسـال
وابيك القائـد الاعلـى , لكـل اجْيـوش قواتـي

ابي وقفه , من اعْيونك , تكفّي عن ميـة رجّـال
أبي فزعه , وابي نزعه , وأغيّـر كـل نزعاتـي

وانا اخترتك لأن اسمك , يسرّي بي شجون ٍ طال
يشجعني على العليـا , واحقّـق كـل طموحاتـي

لانّك رحمـة الكافـل , بعيـن ايتـام وام اعْيـال
ولانّك سطوة القاسي , بعيـن ادْمـوع وجناتـي

ولانّي كل ماشفتـك , عطيـت الحمْـل والحمّـال
أهابـك هيبـة العالـم , لحـزنـي وانفعـالاتـي

أناظر عينك اليمنى , واشـوف الليـل والمـوال
وأناظر عينك اليسرى , أشوف ابشـع نهاياتـي

واضيع اهناك مابين الرموش وبيـن حبّـة خـال
واحب الموت لعيونـك , وكنْـه اجمـل محطاتـي

أنا جيتك ولع عاشق , يـدوّر فيـك راحـة بـال
ولا فكرت لـو لحظـه , بجرحـك لـو بأبياتـي

أنا الدمعه وهي دمعـه , اذا طاحـت وهـي اذلال
أمـد الْهـا هـدب عينـي , والحّفهـا عباياتـي

واخلّي رمش يحظنها , ورمش الْْها يصير اظـلال
حرام اتموت في عيني , وهـي رمـز لمعاناتـي

وبعد هذا تجين انتي , تسوقين الجروح أشكـال ؟
وأنا اللي كنْت احِسْب انّك , حلاة الروح في ذاتي ؟

أما تخْشينَ أنْ يفْنـى , بِفعْلُـك ِ شاعـرٌ قـد آل
بجرحِـكِ للْهَـلاك امسـى , طريـح الإلتفاتاتـي

ألا ويحَ القُلوبْ اللي , تِهِـدْ ابْصَـدْ صُـمْ اجِبـال
والا ويحـي اذا بارضـى , هوانـي أو مذلاتـي

تراني ساكت ابْكيفي , واذا شفـت المعـدّل مـال
ابا اغْسل كل مافيني , مـن احساسـي بزفراتـي

وابا حرّم على نفسي , لو اسْتسلمت لبس اعقـال
ولو ما الغيت طاريِّـك , نهائـي مـن سجلاتـي

وترى اللي فات ذا كلّـه , مجـرد فلسفـة عقـال
وانا عاقل واموت ابْـرك , ولاترخـص قناعاتـي