رســـالـــه مـــن بـــدويــــه

انا يا ناشد عني بدويه =على روس التلاع ارعى حلالي

تحملت الصميل بمهمهيه =تقاصر دونها عزم الرجالي

تناديني تحّسبها خزيّه =وانا اشوف البداوه راس مالي

واشوف العمر لذاته بفيه =بها تركى على النار الدلالي

ولا منا تقابلنا عشّيه =زهم عمي على الفنجال خالي

ونادى في طويل الحس هيه =نبي نسمع قصايدك الجزالي

وجبت القاف من نفس رضيه =على بحر الهجيني والهلالي

امد ّالصوت ماني مستحّيه =مباح والخلا بالليل خالي

ولي درب يوم امشي خويه =عصاي اللي يميني عن شمالي

الامن لاح لي الذيب الرعيّه =تناولته بها يا هم لالي

غديت بحدها كني ّسريه =تزهب كل ساعه للقتالي

قنع سرحان يشبع من يديّه =وعوّد مقوي يم الطوالي

حياة رغم شدتها رخيه =شربنا مرار وصار حالي

بها عشنا على طيب الطويه =نردّ الهرج في وقت المقالي

ولا نمسي وفي هالنفس كيّه =قبل نكوي بها راعي الخمالي

نجود ولا لنا بالجود نيّه =نسوق سمانها قبل الهزالي

ولا نرجي بها رد العطيه =سوى نعم كريمين السبالي

نبي رد الثنا يا هل الحميه =يدوم وغيره من المال بالي

وانا ما اصير لو مت حضريه =ولو حطيتني في قصر عالي

وانا لو كان تنشدني بنيّه =بها وشم البداوه لا يزالي

معي ذكرى البداوه دوم حيّه =تجددها على القلب الليالي

وانا لو عشت بالحضر بدويه =على روس التلاع ارعى حلال