مسموح

أنا ليا اخطى صاحبي قلت مسموح =ماني بمثل أول قريبٍ مدايه

زلة رفيقي تطعن الصدر وتروح =لاهي آخر الدنيا ولاهي البدايه

أذكر له الماضي وانا منه مجروح =من جنس فعله قبل يخطي جزايه

صداقته تبقى معي وين ما اروح =في فرحتي في ضيقتي في رضايه

وليا عطاني سر بالسر ما ابوح =يبقى معايه لين يدفن معايه

ماني بخبلٍ للمساكين مفضوح =في كل ساعه جايبٍ له روايه

اجزى شريك العقل والقلب والروح =بحذف الخطا ما دامي اقدر ورايه

تدرون ليه أضحك وأباديه بمزوح =ابيه كان أخطيت يدمح خطايه

أنا بشر مثله مغربل ومشفوح =عن البشر وش يرفعه مستوايه

أجاوب الورقا الحزينه على الدوح =يا شفت لي عاجز بليا حمايه

ويهزني يا مرني خطو مملوح =تهتز ريضاني ويمطر سمايه

وبالذات ابو رمشٍ ليا ارخاه ذابوح =هذاك عقب الصمت يبحث خفايه

ياشفت زوله لا اقدر آقف ولا اروح = تيبّس أطرافي ويسكر هوايه

اللي سنا خده من البرق به ضوح =عيا يعالجني ويصرف دوايه

انا كتابٍ للمحبين مفتوح =تعال واقره يا نديم القرايه

تاطي قدم رجلي على كل ساموح =ما ضيّقت عوج الطلايب فضايه

أكبح وأفرمل سالفة كل مكبوح =وليا تمادى له طلبت الهدايه

ما أجاري الطرشان والصوت مبحوح =الناس تجري من وسيله لغايه

حصّلت بالدنيا ملذات وجروح =ودوّجت بالديره ولايه ولايه

أضحك وعيني تخفي الحزن والنوح =وعقب التعب ردّيت مرهق وتايه

ولقيت حبر أقلام الأيام ممسوح =خطوة بدايه خاتمتها نهايه