أهداء إلى أعضاء وشعراء منتدى جهينه ....

أبصراحه أحترت والحيره عذاب = هل أنا شاعر أو أنّي هقيت
هل أبقضي العمر أطرد لي سراب ؟ = وينتهي المشوار بي زي مابديت !!!
كيف أبتوصّل إلى لب الجواب = هل أدق بيوت شعري بيت بيت ؟؟
مير أنا بيوتي لها فوق الف باب = ينتهي مشوار عمري ولا قضيت
الحقيقه أنّي ترى أخطيت الحساب = والأكيد أني على شعري جنيت
كم في جوّي تراكم من سحاب = وكم في ليلي سرابي ولا شقيت
ليتها هلت على هاك الهضاب = مير ماأخلصت يومنّي دعيت
أنذبح شعري بسكين الغياب = والمصيبه أنّي على ذبحه رضيت
كنت أحسبه شي من طيش الشباب = ما دريت أنه سكني ما دريت
ومن صغر سني وانا أهوى الصعاب = ليت صعب الشعر ضمن إللي هويت
طول عمري عشت وافي للصحاب = كيف مع صحبت قصيدي ما وفيت
من سيوف اللوم وحراب العتاب = ما تنجِيني دموعي لو بكيت
يا قصيدي كل مذنب يستتاب = ومعترف لك إني بحقك خطيت
معترف لك إني أهملتك وغاب = نور حرفك خلف سوري اللي بنيت
سو فيّ أللي بدالك من عقاب = هاك قلبي عاقبه زي مابغيت
أغرس أنيابك بقلبي ناب ناب = ليت صوت الأه يطرب لك يليت
من عروق القلب أعصر لك شراب = إرتوي منها إلي منّك ضميت
يا قصيدي كل ما تطلب مُجاب = لو تبي بنتٍ من أفكاري عطيت
لو بنات أفكاري يخلعن الحجاب = كنت يا شعري من مبطي غويت
لا تقول الحين عقب الراس شاب = توّك بعيني تراك أللي حليت