قصيدة كانت موجهه لاخي الشاعرماجد المرواني

بعد ماعايشت ضيقه لاخيال ولا حقيقه=مقتنع في واقعي والياس مزعجني خياله
أبتسم حيره وانا في داخلي مليون ضيقه=واتحاشى من سألني لجل ماجاوب سواله
وبعد زادت ضيقتي مال الصديق الا صديقه=وكل موقف مااعتقد يشفيك فيه الا رجاله
كيف ياماجد مدام الصبر انا ماعاد اطيقه=والهموم اليوم فيني واصله حد الثماله
منخدع في وقت ظالم بعد مااغراه ابريقه=لين تاهت خطوته من طيب ماهي من جهاله
ومستمر ابخطوته بالعز خطواته وثيقه=في هدف سامي وتبقى غايته كسب الجماله
ومن مشى درب المراجل ماربح من هو يعيقه=مايغير مذهبه وقته بأساليب النذاله
ذنبه انه متبع مال الرفيق الا رفيقه=ومنهجه بأن المراجل ماتجي لك بالسهاله
همته تخلق طموحه كل مرقاب(ن)يويقه=مؤمن ان العبد ناقص وان لله الكماله
يكتم همومه بصدره ماشكى حتى للشقيقه=صد عن همه ولكن الهم تال الوقت جاله
ظاهره يوح السعاده باطنه فاح ابحريقه=ناوي(ن) شرب الزلال ومالحق يشرب زلاله
ناشف(ن)حلقه ظماء ماعاد يقدر بلع ريقه=مااتضح همه عليه ولاتبين في مقاله
ناصي ابهمه وحيد الملك ماينصى الخليقه=بالامل عايش ويرجى بالامل رب الجلاله
قلتها من بعد شفتك عايش بنفس الطريقه=جيت ابوجز قصتي بالشعر يومه جاء مجاله
يمكن انك تعتبر بجروح من وقتي عميقه=وماتفاجيك اليالي في زمن مااكثر هزاله
وانت شاعر في جزيل الشعر تستاهل وثيقه=الجزيله عادتك والجزل منبعه الجزاله
ودامنا متمسكين ابطيب والعروه وثيقه=ماخسر رجل(ن) يحط المرجله هي راس ماله
والله اني عشت ضيقه بالخيال وبالحقيقه=لكن اعيش بواقعي والياس مزعجني خياله