الطيب له بيبان وفروع وأسباب ؟؟؟؟

يـا عاذلي يكفي كفى لوم وعتاب = مـا لي ومـا لك وانت مالك ومالي
حنا بشتى افكارنا مثل الأغراب = أغراب فكر ولا يطول الجدالي
كل على منهاج سيره وهنداب = وانت ابخص بحالك وانا ابخص بحالي
مـا لي ولا ابي عن الطيب مجناب = ولا انته وكيل ولاشريكٍ بمالي
والطيب فرق الروس عن روس الاذناب = لاعاش راس مـا لجوده ظلالي
ظني صفات الادمي كان متا طاب = يبقى البخيل اللي حياته وبالي
وكل بعرفه مقتنع بصر واعجاب = لحدود عرفه واثق انه مثالي
مـا راوده دون الثقه شك مرتاب = مـا يعترف بـا لهون حتى الكلالي
والفعل يرفا أشناب ويقصر أشناب = ولولا الفعل مـا يعرفون الرجالي
والحي صاب ان طاب وان شح مـا صاب = أمـا نزل وإلا اعتلى راس عالي
ومن شح عاب وياسفابه ليا عاب = حتى من اسمه يستحون العيالي
يلقى عليه مدور العيب مرقاب = وصفٍ ببابه يوصفون السفالي
والمال مـا يرفع ذليله ليا خاب = والقل مـا عيب كريم السبالي
لاهل الوفا مردود والهون هزاب = ولابد مـا تفتق فتوق الخلالي
والشح بـا هل الشح مـا اغنى ولا ثاب = اشحاح الايادي يوصفون الحثالي
كسابة الشينه مهازيب الاجناب = سناحة الواجب عبيد الريالي
لا قامت بواجب ولا فكت أنشاب = حفاظة المال الحرام الحلالي
للهون ناس وللوفا روس واصحاب = والطيب مجد ومنهج المجد غالي
مقدار للطيّب وفخر للانساب = بـا لنعم يذكر كل مـا جا مجالي
كم من غناة مفخرة روس الاقراب = وكم من غناة زودها للزوالي
كم من غني بـايع الجود بتراب = يصد عمد بواجبه مـا يبالي
وكم طيب ميسور للنعم كساب = صمود للواجب على كل حالي
مـا صد عن مـاجوب وجهه ولاغاب = ليا صابه الواجب لوالجيب خالي
لو حدته بقعا من الضرس للناب = دايم على الواجب صمود انفعالي
ومن جاد بـالماجود للجود طلاب = واللي غني دايم عزيز الجلالي
والطيب له بيبان وفروع واسباب = والكبد يبهجها القراح الزلالي
من مدة السفرة ليا فك الارقاب = كلٍ بما جوده يجود الجزالي
والزاد له مفتاق والعذب شراب = وبداية المعروف حسن القبالي
طيب البشاشه من وجه طيب الجاب = معروف بالملهوف دون السوالي
يا سامعي كلش ولا صكة الباب = والرزق عند اللي ينشي الخيالي
كلش ولا متقِِِِى صوب الاسلاب = الصعصعي متستر بالسمالي
الطيب عالي عن محاريف كذاب = لعل ما يبقى للانذال تالي
الطيب ما يدخل محاريف نصاب = ولا ياصله عزم الكلال الكحالي