.......بيت الشعر.....

اقول وابدا القول بسم الله ياذكر الحبيب = ولاخير في قولا مايبدا قايله بالبسمله

واساله التوفيق سبحانه ولاغيره مجيب =الواحد اللي مطلع بالكون هذا باكمله

من بعدها ناديت يابيت الشعر خلك قريب = اليوم يومك والركايب بالحمول محمله

ومثلك اذا كسب الجميله كسبها ماهو غريب = انا اشهد انك كل ماتبدي تجيب مجمله

تارد مثل ورد الضوامي يوم تارد للقليب =ولا غصت في بحر الشعر تجلب من العمق اجمله

واللي تعامل بالادب من دون شك انسان اديب = ولايمكن يحوز المراجل غير راعي مرجله

ويالله بحظ يقوم لانامو رديين النصيب =حظا يطلعنا العلا مايردنا للمسفله

واقول مفروجه وانا مادري زماني وش يجيب = والوقت سلم يطلعه واحد والاخر ينزله

ويانجم ياللي يقدي السارين نورك لايغيب = ان غاب نورك يبلش الساري بحمله واجمله

لاغاب نورك كود باقي روس ماشابت تشيب = حتى الرضيع الشيب في راسه وهو في محمله

يقولها اللي من عذابه ون ونات الصويب =جرحه بليغ ورافض يبرى ورافض يقتله

وقال الطبيب اما يطيب الجرح والا مايطيب =وانا ادري انه ياكذا ياما كذا قبل اساله

بعض الجروح يطيب لكن بعضها جرحا عطيب = الله يعين اللي جروحه فالحشا مستفحله

وش حيلة اللي فارض قفراء حافته عشرين ذيب= مافيهن اللي لوطلب مهله دقائق يمهله

والوقت قاسي والليالي بين خبث وبين طيب = والله الى انه راد يجزاء الشخص من جنس اعمله

والعلم تم وجاك كل العلم وافهم يالبيب =ولايهمني من يفهم الموضوع واللي يجهله