سبعة من الروقة ينتصرون على الندهة المطيري وجماعته

هاضني قبل امس الظهر يوم اذن نصيب==قال جاكم صايح ستر راسه في عصاه
ثم وضينا من الماء على جال القليب==وقوم المذن وصلينا وعجلنا الصلاه
يوم لدينا ليا بنت ماقد جت بصيب==كن حبة ديدها في النحر جمرة غضاه
قلت يابنت استحي ترى التبريج عيب==قالت العلم الدبش يالاد روق اقفي علاه
ثم قربنا المعارك لعجلات الهذيب==كل وحده كامل قرحها واهيه فتاه
زادهم الدر والبر وعمور الرطيب==لين راحت وحدتهن كنها وصف المهاه
سبعة والكل منا على مثل القضيب==طالع من كف صقار يطرد له قطاه
جعل ذرعان لحقنا عليها ماتعيب==يوم ياطن الدعث كنهن ياطن صفاه
يوم جيناهم ليا شيخهم رايه غضيب==لين خلينا الرمك بالحذاء تاطا علاه
يوم قسمهم صليبين جيناهم صليب==ماتثور البندق الا عقب ماتلمس قفاه
والله انك تزهم الرجل باسمه مايجيب==موقف درب النفس زمة مثل الحصاه
طامع فينا بقومه لعل امه تخيب==جا يبي خيبة رجانا وخيبنا رجاه
حشمة اللي يوم جا الوقت تعطينا الحليب==يوم لاذ الستر مطعومنا حدر الرغاه
هجمة من وقت عالي وشباب وشبيب==مايجيها طامع غير نرثع في شواه
ياذيابة كشب والخال وذياب الجذيب==انحري هكران تلقين الفرايس في قداه
ثم عد بالضلغ ياذيب واشعط بالقنيب==لين ما في كشب من ضبعه توحي عواه