...تنفيذ القرار....

مابين هقوات الكبار وبين نظرات الصغار=وقفت فارض محايده بين الامل والمستحيل

فالفتره اللي بين فرقا الليل وقدوم النهار=اسرح مع الذكرى قليل و تقرع اجراس الرحيل

في دار قفراء موحشه مامثلها فالارض دار=لمقومات العيش لافيها كثير ولا قليل

وللمره الاولى شعرت اشلون مر الانتظار=والثانيه صارت بعيني كنها العام الطويل

ياصعبها لاصرت مابين احتيار واختيار=لاخيروك تموت والا تعيش فالدنيا ذليل

هذا قرار ويلزمك هالحين تنفيذ القرار=اختار لك واحد من الدربين ماعنهن بديل

قلت الوكاد ان الكبير اختار لدروب الكبار=يامرحبا بالموت لنه جاء على ستر وجميل

قالو علامك قلت هذا العلم واللي صار صار=الله بمدات الكريم ولا بمدات البخيل

مابين نظرات الصغار وبين هقوات الكبار=سريت مع حلم سرابي عقب ساعات الاصيل

البارحه حلمي سرابي من ديار الى ديار=وشفت القبيح بكل هالدنيا وشاهدت الجميل

واريت وجه ابيض ووجه اسمر ووجه اكثر سمار=وواحد شرابه من هماج وذاك شربه سلسبيل

وسمعت صرخات الثكالا من محلات كثار=صرخات من بغداد والبصره وغزه والخليل

وصرخة طفل فالقدس مع صرخة طفل في قندهار=وشعرت كن الارض صارت كلها نوح وعويل

وفزيت من نومي وعيني قدمها يقدح شرار=واخذت ساعه كل مامسح دمعتي ترجع تسيل

وجلست افكر مثل شخص يعيش لحظات احتضار=فكره تشتت مابقا عنده من افكاره حصيل

الله وكبر كيف دار الفلك فينا واستدار =والمجد ذكرى صار بالنسبه لنا مابه مقيل

من بعد ماكنا رجال وفالفتيل انشب نار=راحت علينا مابقى معنا لانار ولافتيل

انا اشهد ان العز عز سوات من العار عار=وفكارنا صارت كذا مابين لقح وذيك حيل

واكبر دليل الشعر شوفه متجه للانحدار=انظر فحاله كيف صارت كان تبحث عن دليل

الكل ينهش فيه والله من يمين ومن يسار=وجسمه بعد ماكان في صحه بداء منهك هزيل

هذي اهانه للشعر ياللي تقولون ازدهار=اي ازدهار الوصمه الي تكسر شموخ النخيل

هذا كلامي واحذفه في غبت السبع البحار=يقولها شاعر قضى عمره وهو عابر سبيل