إلى بوش مع عدم التحية!

يابوش حنّا مانبي غيـر الإسلام = ولا نرتضي يابـوش فيه البـديله

يابوش دين محمـد خير الأنـام = أطهر من اللي في ضميرك تشيله

يامقدّم الحرمة على المسلم إمـام = أنا اشـهـد إنك يالمريكـي هبيله

يابوش أنت وأبرهة خوّة إجـرام = ياجعــل فالك فال جيـشه وفيله

تجيك من رب الملا طيور حوّام = بابيـل ترســم عـاقبتك الوبيله

بحقوق من صلى على القبلةوصام = وحقوق من له عند ربه فضيـلة!

يالقـايد اللي للشيـاطين خـدّام = ياليت عنـدي في تصيّدك حيـلة

كم عام قايد دولة الكفر كم عـام = تاطى ديار روسـها لك عميـلة

والقصد نفط تحتها بحر لطّــام = منـواك خايب والمساعي فشيلة

مادام بديـار المناعيـر مقـدام = تبقى حـلومك بألف ليلة وليـلة

هذي ديار مابـها روس تنضـام = دار العقـول الراسيـات الثقيلة

دار القروم اللي لها دينها حـزام =أهل الوغى وأهل الوفاءوالصميلة

مازلزلت عمــدانهم كثر الآلام = ولا راعهـم طابور جيشك وخيله

أعمارهم من دون الأوطان تنسام = وسيـوفهم يوم المـلاقى صقيلة

أفعالـهم تشهد بها كل الأقـوام = واشباههم بين الخـلايق قليـله

أرض الجزيرة كلها اخوال واعمام = اخوان دين وحاشمـين القبيـلة

ما همهم في نصرة الدين لوّام = ولا شاقهم متقاسمـين الهـزيله

يابوش خلك من تهاويل الأحلام = واصحى تـرانا قادحين الفتيـلة

نحرق بها من نيته هدم الاسلام = ونهدي بها كل تايه عن سبيله

واحذر تقرب للحرامين الاقدام = لا غش رايك ناصحه مع دليـله

قلته وأنا حرفي كما برق يشام = يشتـاقه اللي عارفيـن المخـيلة