قصيده بالاسهم ممتعه ،،،،،،،

بين الأمـل والرغبـه الذاتيّـه = واحلام كانت من قبـل ورديّـه
قرّرت ابيع اللي وراي ودونـي = وافتح لي ابْها محفظـه بنكيّـه
أبيع فيهـا واشتـري فالأسهـم = واحقّق ابْهـا كـلّ حلـمٍ ليّـه
ويصير لي عقب الرصيد الخالي = أكثر من المليـون لـو بشويّـه
مبلغ بسيط اعدّل ابْه اوضاعـي = واحسّن ابْه اوضاعـي الماليّـه
واشريبه أطلق فلّـةٍ فـي مكّـه = على شـوارع اربعـه مبينيّـه
واليا لمحنـي واحـدٍ فالشـارع = سلّـم ومـدّ يديـه يـمّ ايديّـه
وقال انت شيخ البورْصَه امْحمّد = إسمك يردّد بيـن ذيـك وذيّـه
وانا بلهجة واثـقٍ مـن نفسـه = أردّد ايـه وعاشـت الحريّـه
هذا بفضـل الله ثـم مجهـودي = وهذي نتاج الخطّـه الخمسيّـه
وهذي ترا ماجاتلـي بالساهـل = تبْغا دراسات وخطـط علميّـه
وعلى العموم احلام لوّ احْسِبْهـا = يبْغالـي انظـم لجلهـا الفيّـه
مِنْ أجل هذا بَرْجع لْموضوعي = والقصّه اللـي بيّحـتْ خافيّـه
قصّه بدايتها جمعـت فلوسـي = اللي سلَفْ واللي وصَلْ عانيّـه
مِن لابتي ربعي عصابة راسي = أهل الفخـر والعـز والجاهيّـه
واخذت انا المبلغ بوجه السرعه = للراجحـي وتسوقنـي رجليّـه
ومِنْ يوم جيت البنك فيّه رحّب = وقال استريح وحاجتك مقضيّـه
ولاطَلَعْـت الاّ وانـا محفظتـي = مِعْطيني الها ارْقامـي السريـه
واخذت امارس شغلتي في بيتي = على سلـوم العالـم العصريّـه
وقمت اتصيّد كلّْ سهـمٍ هابـط = واشري منه بالـوزن والكميّـه
غشامةٍ منّـي وِنُصْـح غشيّـم = ورّطنـي بْوصفاتـه الطبـيّـه
طِعْتـه والا ياليتنـي ماطِعتـه = ولاسلكـت دروبـه الملـويّـه
لكنّ طِعْته والنتيجـه وشْ هـي = عقب الرفاعه طِحْت في دهويّه
واوّل رداة الحظ فصل الهاتـف = وقّف جميـع اعمالـي النتيّـه
قِلْت الْحَق الصالات قَبْل تقفّـل = مستعجـل ومسكتنـي الدوريّـه
قال انت قاطع للاشاره مِسْـرِع = وسجّل علـيّ مْخالفـه فوريّـه
ولولاه قدّرْني وشـاف بوجهـي = ملامح العاقـل وحسْـنَ النيّـه
يِمديه ودّانـي علـى التخشيبـه = حَسْب النّظـام ولائحـه أمنيّـه
مير المهم انّي نِفَـذْت بْجلـدي = وساعة وِصلْت الصاله السهميّه
لقيت نـاسٍ وضعهـم متذبـذب = وعيونهـم فالشاشـه الضوئيّـه
هذاك ظغطه مرتفـع ومْكشّـر = وهـذاك جاتـه حالـةٍ نفسيّـه
وهذاك يضحك مِسْفهلّ حجاجـه = ربحان والمكسب مِيَـه فالميّـه
وانا على ماقيل سارح ضـاوي = ولاسْتفـدت بروحتـي والجيّـه
غير العنا والبهذلـه والضيقـه = ومْوشّـرٍ مايَعْـرِف الحنـيّـه
اليا لمحتـه هابـطٍ هبّـط بـي = كنّه يحـوّل بـي مـع القدّيّـه
ومايوم شِفْته صاعدٍ ومْخضّـر = الاّ احمـرٍ دايـم مشيّـب فيّـه
نسّاني اسمي واسم ابوي وجدّي = واحْترْت في اوضاعي الصحيّه
ومن كُثْر ماهومشغلٍ تفكيـري = أشغالي الأخرى غـدت منْسيّـه
حتّى مديـر المدرسـه نادانـي = وقلّي عليك مْخالفـات . وهيّـه
مافيه حصّه كاملـه تَحْضرْهـا = وعقب العَشر ماتنوجد في ذيّـه
أُمّا اعتدل والا ترى بارفع بـك = واعطيك حسميّه ورى حسميّـه
وان كان شفت الحسم ماهو نافع = باحيل وضعك للجهه الرسميّـه
وانا برغم اللي حصلّـي كلّـه = أطرد ورى صفقاتـي الوهميّـه
حتّى بـدا للبنـك فِيّـه نَظْـرَه = وارسل علـيّ رْسالـةٍ خطيّـه
فيها قرار بوقف كـلّ انشطتـي = لَـنّ النتايـج كلّهـا سلبـيّـه
وهذي نهايـة واحـدٍ متهـوّر = يطرد سراب احلامه الورديّـه
والحظ دايم واقفٍ مـن دونـه = لاجـاب هـاذيّـه ولاهـاذيّـه
ومِنْ عقب ماهو مستريح وسالي = دار الزمان وطاح فـي دهويّـه