...ست الحبايب...

ياحظ قوم الى متى وانته معيي لاتقوم=خلاص قوم انا اشهد انك نمت نومه كافيه

عزالله اني من سببك القايله شفت النجوم=ودعست فوق الجمره الحمراء ورجلي حافيه

ياحظ كان ان الحظوظ تقوم في حب الخشوم=حبيت خشمك ثم حبيته بنيه صافيه

الى متى ماني محصل لك قسم بين القسوم=قسمتك ضاعت يوم غيرك جت قسومه وافيه

الظاهر انك مانت فالح لادفاع ولاهجوم=الله يعافينا بلاك الله بعله خافيه

الله يبارك بالشجاع ولايبارك بالرخوم=ماعمر جت وقفت ردي العزم وقفه شافيه

ياحظ من وانا صغير احلم وياكبر الحلوم=واشب ناري فالمساء وشوي ناري طافيه

والى انطفت ناري بديت اون من كثر الهموم=واسرج لفكري من عذابي مفردات القافيه

وامي لاشافتني حزين بقلبها الشفق الرحوم=تقول لاتهتم ياوليدي ياليت العافيه

من عادت الايام وانا امك كذا برد وسموم=وعقب الليال البارده تاتي ليالي دافيه

وارد يمه ناظري حظي غدا بيت مهدوم=اعطيت وجهي لليالي واليالي جافيه

لكن لعلك تسلمي والحظ عمره مايقوم=شوفتك ياست الحبايب في عيوني كافيه