قصيدة الحضاره ..........

الحضاره غيّـرت بعـض الرجـال = وانتهج طبـعٍ علـى طبعـه دخيـل
واصبحـت عاداتنـا حلـم وخيـال = وينهـا مـا عـاد منهـا إلا القليـل
في رخا لا شك ضيـق وهـم بـال = في زحام الشغـل ضيّعنـا الدليـل
وين الأول وين طبـع النـاس زال = وين راحت عشرة العمـر الطويـل
يبخسون أهل الجنوب أهل الشمـال = والتـزاور بينهـم سلـمٍ جمـيـل
ذاك فـيٍّ مـا خـذٍ دوره ومــال = ما بقى إلا دور مسلـوب الحصيـل
الكسـل خـلا ( ترامسـنـا ) دلال = دلــةٍ مـحـدٍ يفوّحـهـا بهـيـل
وجار بيت اليـوم مسيـاره محـال = مايزورك لـو تعَزمـه كـل ليـل
والقلوب أصفى من الماي الـزلال = والهدف ما فيـه شـك انـه نبيـل
يـوم ثلاجـا تنـا ذيـك الجحـال = والمراوح من سعف خوص النخيل
والمواتـر عندنـا ركـب الجمـال = والصواليـن الخفيفـه قبـل حيـل
والقرى مـا بينهـا خـط اتصـال = بينهـا مسـرى ومسـراح ومقيـل
والكنب من سـوم دمثـات الرمـال = والضجيج اخلاج و( البوري) صهيل
والإضاءه من خشب سمـرٍ طـوال = (وليتنـا) ذاك السـراج أبـو فتيـل
وكـل فجـرٍ نبتديـه بفتـح فــال = نكهةٍ مـن ريـح قـرف وزنجبيـل
نذبح الخرفـان والصيـد الحـلال = وشربنا مـن مـا قـراحٍ سلسبيـل
حـي مسيـار الفيافـي والـتـلال = وحـي منـزال البـداوه والرحيـل
يـوم فينـا للمواجيـب احتـمـال = وروسنا ماهي تعـرف المستحيـل
اشهد إن من عاشها من قبـل نـال = وعاشها في وقتنـا ذا شـاف ويـل
مـا نضيّـع ورث عمّـان وخـوال = ولا يحب أحيا التراث إلا الأصيـل