يوم الرحيل

دمعت العين يوم أني نويت الرحيل= تسأل العين أبقى كيف والا أنتثر
رد من داخلي صوتا حزينا عليل = أنزلي يادموع العين وش ننتظر
وانتثر فوق خدي سيل من فوق سيل = ماتوقفي عيون دمع مثل المطر
أعترف لك هزمتيني وهذا دليل = ما يهزم الشجاع إلا اسلوب الغدر
أنحرقت ورجعت وقلت صبر(ن) جميل = كثرت الدمع مـا ضني ترد القدر
ثم فكرت جيلاً مر من بعد جيل = ما توقف حياة(ن) من مفارق بشر
والله إن لك من الأيام يوماً طويل = تسألي فيه نفسك وش حصل يالدهر
وان كرهتك كثر ما كنت أحبك قليل = وأن ذكرتك ذكرت أيام ما تنذكر
وإن طلبتي وصالي يوم ذا مستحيل = لو قضيتي حياتك بالأسف والعذر
لو تعدي الفيافي ميل من بعد ميل = لو تضمين نجم سهيل ويا القمر
لو تشوفي نجوم الظهر وقت المقيل = لو دموعك من الأحزان تملى البحر
لو تقولين بين الناس مالك مثيل = لو على حالك البائس يذوب الحجر
العزاء تدري أن ما يرد القتيل = وتدري إن الخواطر كسرها ما أنجبر
دام حبك وعشقك كان مزحا ثقيل = وكان أكبر خطاي وصفتك بدر
أنت مالك وصف إلا بغصنِ هزيل = وين ما حركه صوت الهوى ينحدر
شامت النفس عن بعض الكلام الرذيل = ولو بنكتب صفاتك ما يكف الحبر
ساعت الصفر حانت قوم شب الفتيل = واحرقي ما تبقى من بقايا العمر
صرت مع جملة الماشين عابر سبيل = والبقايا خفايا خلها بالصدر