ما كلّ من نادوه رجـّــال , رجــّــال !!!!!!

يالله أنا زابنك عن ضيقـة البـال = يافـارج الضيقـات بالإنفـراجـة

بالي يضيق وداخـلٍ فيـه ولـوال = مدري متى يركد ويصفـي مزاجـه

مامقصدي شبعـة ولاقلـة ريـال = ولافي من سموى العذاريب حاجـة

قصدي همومٍ جتني ألوان وأشكـال = من وقتنا اللي صار فيه إنعواجـه

وقتٍ علينا طلّـع أجيـال وأجيـال = فيها الخيانـة والغـدر والهماجـة

غير الحسد والبخل وطبوع الأنذال = تحسد سـلام ومرحبـا والمواجـه

والرجل ماهو من لبس بشت وعقال = وإلا يجيك أبيض سوات الخواجـة

بعض العرب ماغير ياساتر الحـال = لوتفتشـه والله مايسـوى (......)

ماكل من نـادوه رجـال . رجـال = الرجل واضح والحلاجـة حلاجـة

الرجل من يحمـى كلامـه لياقـال = ويجيك للخاطر بشـوشٍ حجاجـه

ولاصك دون الناس بابه بالأقفـال = وإلاّ ليا جاء الضيف طفّى سراجـه

ولياطلبتـه رأي حــلال فـتـال = يعطيك زبدة هرج ماهـو علاجـة

هذا وأنـا لازلـت للقلـب عـذال = أبى أعذله لين إني ألقـى علاجـه

وإن مالقيت عـلاج تـراي رحـال = رحلت فـي بـرٍ وسـاعٍ فجاجـه

في مدركة ماعـاد للـروح منـزال = فيها الصبا والجو تصافق عجاجـه