انا الليله حزين وضايق صدري ولا ادري ليه..!

انا الليله حزين وضايقٍ صدري ولادري ليه=اشوف الحزن قدامي واشوف الهم يبرالي
سرى ليلي وانا سهران واشيل القلم والقيه=اطشه لاعجز يكتب هواجيسٍ على بالي
هواجيسي تلف الكون من قاصيه لاقاصيه=وانا في مجلسي مابين ضو النار ودلالي
دلالي راس مالي لاريال ولاكنزت جنيه=ابديها على حاجات نفسي وارخص الغالي
ولاجيت اتصنع والتصنع خاسرٍ راعيه=ورثت الطيب من جدي وابوي وعمي وخالي
يقر لنا الكريم وكل حرٍ صادقٍ نزيه=ويجحدنا الجبان المستهان وكل محتالي
انا ابن البدو بيت السدو كنت ابنيه واسكن فيه=احب المنزل الخالي واحب المرقب العالي
ومنازلنا البيان ولا نزلنا منزلٍ نخفيه=وارباع بيوتنا يوم القسى للضيف مدهالي
نجوب الارض طول وعرض براق الحيا نتليه=لجل عرب البكار اللي يسلي شوفها الجالي
لنا التاريخ معها ناصعٍ ما يقبل التشويه=حميناها بحد السيف يوم الدم شلالي
وعجزنا عن علفها يوم جات وجيه دون وجيه=صدفنا ما صدفنا فالليالي والله الوالي
وخذوها اهل الفلوس ولابقي شياً بها نرجيه=ياكود نشوفها بعيوننا ما عاد نحتالي
كلامٍ يحزن ابطال الرجال ويضحك السفيه=وعادات السفيه يقول وليا قال ما طالي
وسيع الصدر ناقص قدر يضحك والغبا معميه=لو أنك قلت له (ياهم الالي) قال يا لالي
اسالك يا كريمٍ من طلب منه الفرج ينجيه=تجير القلب من جور الهموم الي برت حالي
عيوني تسهر الليل الطويل ولا قدرت اسريه=وكم دربٍ ليامني نويته ما تهيالي
تقيدنا لوازمنا مثل من قيدوا رجليه=قيادٍ من حديد ومن وراه ابواب واقفالي
وليا ضاعت مراميع الحكيم وفطنة النبيه=نزحت بهاجسي وامسيت في جو الخلا الخالي
واسج مع الكلام الي يكمل بينه خافيه=على الميزان ما ينقص عن المطلوب مثقالي
ولا والله كتبت الشعر حتى يمدحه قاريه=ولاهاجمت نقادي ولاطاوعت عذالي
ولادقيت باب الشهرة اللي ما ربح ناصيه=ولاجيته ولاتعبت له خطي ومرسالي
لقيت من الشدايد مالقى غيري من الترفيه=شباب بعقل شايب مدركٍ في كل الاحوالي
ارافق كل طيب والردي لامرني طاريه=طلبت الله يباعد بين منزاله ومنزالي
يطول الشرح في بعض الكلام وما بديت انهيه=بذكر اللي فلق بحره لموسى واغرق التالي