وداعية

يعيش الحب وش يعني..يموت الحب شي عادي؟!=مادام قلوبنا ماتت مشاعرها .. وهي حيه
أحسب لاجيته على كيفي ... يطاوعني=(مغفل) من يعيش بها الزمن أحلام وردية
من أول ماعرفتك تعطي إحساسك وتمنعني=وأقول تمون يانبع الحلا...والحب حنيه
كثر ماكنت تكذب في كلامك..كنت تقنعني=دليل اني على كثر الجفا ...سلمتك ايديه
عشاني قلتلك: مابدخل بها الجو ..طلعني=تروح وتاخذ الدنيا معاك..وتقطع الجيه
مع اني قلت: اذا ماطاوعك الوقت الردي..طعني=واذا ماحيتني كلك..تعال..شويه ..شويه
لك الله يوم أحي مشتاق لك والشوق يدفعني=كأني رايح للموت بيديني..ورجليه
واعرف ان مر في بالك تولعني ..تولعني=مادامه شي في بالك ...تجيبه ميه بالميه
وصلت لمرحلة...حتى الشعور العذب ..يخدعني=واحس اني على النية...وانا فعلا على النية
بكملك كلامي ...بس تكفى لاتقاطعني=بقى جمر الكلام..ودمعه بالعين مخفيه
أمانه..قبل أروح وينتهي كل شي..طالعني=عشان تعرف وش معنى العطا...قبل الأنانية
أبرحل..والطريق اللي يودي مايرجعني=يبي يغنيني الله عن هوا حبك...وطاريه
خذ الباب بطريقك..والعذر ماعاد ينفعني=ترى ماعاد لك قيمة...ولا للحب أهمية
ومثل ماتسمع لعبد الكريم..أبيك تسمعني=وداعية...يا آخر ليلة تجمعنا...وداعية