ثلاث سنين وأنا أخطط لهذا اليوم يا بو سعود

ثلاث سنين وأنا أخطط لهذا اليوم يا بو سعود=تيسر حالي وجاهز أوفي وعدي بوقته


وفجأة جتني تتعذر تقول تأخرت الوعود=وانا مستغرب وأسمع كأني وعدها خنته


حسبت انها تمازحني وتتصنع جفا وأسلوب=ضحكت بوجهها من قلب مع انها بايخة النكته


وقالت ارضى بالواقع قلبي ما هو المعهود=تغير كل شي صوبك نصيبي ما أظن انت


كنت بيوم محبوبي ولكن ما اظن تعود=وصل من قبل ما توصل وانا ذاك الصبر عفته


ولكن تكفى صدقني ويشهد ربي المعبود=ترى ما خنتك بغفلة ولا كلمته وشفته


صراحة اهلي قالولي بانه ولد اصل وجود=وجتني امه بالصورة وبكلمات المدح اخته


سكت وقلت هي فرصة مدام الجود في الموجود=وقالوا كل من حولي علامات الرضا سكته


وانا فكرت دام امه واخته ما عليهم زود=اكيد اني براضيهم اذا وافقت واخترته


واراضي اهلي واخواني مدام ان الفرح مقصود=عطيت الناس انا كلمة ومعاهم وقتي حددته


ولا اقدر اغيرها ترى عند العرب منقود =اوافق واعتذر باكر واقول الراي غيرته


تبي تشرحلي المنقود تصدق عاد يا بو سعود=تبيني أقتنع وأرضى بحال عمري ما عشته


انا ماني بقايل لها عسى يفرش ثراها ورود=بعد ما حطمت قلبي وطعم الموت جربته


عسى بفستانها أشواك وبثوبه عقارب سود=ونار تحرق الكوشه وتحرق بيتهم حتى


وموت بليلة الدخلة يبرد حرتي ياكود=ولا احس انه بحضنه يلامس خد لامسته


علي اهون اذا ماتوا ولا بنفس السرير رقود=ترى صعبه علي اتخيل اللي ما تخيلته


عسى قاع الثرا يقسى ويتحول صخر جلمود=وحفار القبر يرفض يسوي فوق مقدرته


ترى دفنت عديم الذات تلوع حتى كبد الدود=ومن خان العهود ومات تعافه حتى مقبرته


عسى ربي يجازيهم بحبل من مسد ممدود=ويعلقهم من اطرافه وفوقه نار وتحته


أنا ماني حقود وشين ولاني من نسل نمرود=ومن حطه نفسه بوضعي بقول اللي انا قلته


مدام الفعل له ردة فعل والله ابشري بردود=بدعي دامني حي وبغرس للدعا نبته


وبسقيها نزيف القلب ودمع ما رحم الخدود=وتكبر والثمر ثاري من اللي خانني وصنته


انا نذر علي اكتب وافجر هالقصيد رعود=واسمع كل بشر صوتي عجبته ولا زعلته


واردد للي يسمعني اذا حبيت حط حدود=انا حبيت بدون حدود وشوف اللي تكبدته


ثلاث سنين انا ابني وجت صورة بكل برود=خذت مني شقا عمري وحلم قلت حققته