البارحه نومي على راس كوعي (الشاعر الشيخ: حمود بن مليحان الجهني)

البارحه نومي على راس كوعي=والعين عافت نومها من سهرها
قالوا علامك؟ قلت هذي طبوعي=لادك هاجوسي وقلبي حضرها
نفسي طموح ولا تحب الهزوعي=والعين شافت ما يحقق سهرها
دنيا تقلب بين سبت وربوعي=واللي بغاله حاجةٍ ما قدرها
فيها قليل المال ماله فزوعي=لو صاح محد بينقذه من خطرها
ما سايلت عن حاملين الدروعي=خيالها منكف من أول شهرها
يرجع بها للخلف بعد الطلوعي=وتنزله تحت القدم من ظهرها
إليا ادبرت ماهي بيمه رجوعي=ما تنلحق لو شد حيله بثرها
لو أشرقت له شمسها بالطلوعي=لابد من ليلٍ يغطي قمرها
من لا كسب فيها حسين السنوعي=ما تنفعه دنياه لو هو زبرها
والرابح اللي صار فيها قنوعي=واختار دار الاخرة عن ديرها
أوصيك يا ابني في وصاة نفوعي=احفظ وصاة ابوك لانه ذكرها
دينك تكملها وخلك طموعي=في طاعة المولى وجنب شررها
طيعه بما قال الرسول الشفوعي=ينقذك من ميقاف ناس حشرها
وأمك تراها لك حنون وجزوعي=تسهر عليك ولا تكاثر سهرها
تحملت بلواك من لك اسبوعي=تسعة شهور تنقلك في ظهرها
ترفاك لا يمسك ظماناً وجوعي=كم مرة تعطيك صافي دررها
في برها لا تصير قاسي قطوعي=اخفض لها ذلك ومسح عبرها
وابوك لم المال من كل نوعي=تعب على شانك وقاسا دهرها
يوم اكتمل سنك وشبرك يبوعي=عن الطويله ساعدك ما قصرها
سلمك ماله يا حسين السنوعي=يبي تقوم بواجبه وتعمرها
سلم مفاتيحه ويرجى النفوعي=انته قرار العين وانته نظرها
ان صرت للوالد حنونٍ وطوعي=سلفه وتحصد بالتوالي ثمرها
جزاك من جنس العمل بأي نوعي=إفعل وتلقى خيرها من شررها
هذا وجارك لا تجي له دنوعي=والعين يمه لا تردد نظرها
لو انته المسلم وجارك شيوعي=اعطه حقوق الجار في مختصرها
وإليا بغيت منقشات الردوعي=وتبغى حليله صافيه من كدرها
لا تاخذ الا من بنات الربوعي=نطاحة الهيجا اليا ازما بحرها
اهل المكارم ناطحين الجموعي=اللي سوالفهو يسرك خبرها
يجي ولدها بالمكارم بتوعي=سيفٍ اليا قص القضيه بترها
وبنت الردى لا تصير فيها طموعي=ترا حلاها ما يلاقي مررها
لو خدها يشذا بياض الشموعي=لا تغرك الجذله ونثرت شعرها
سحابةٍ لو خضرت للرتوعي=دار وخيمه ما يضلل شجرها
عينك عليها لا تهل الدموعي=ما تندم الا عند حاصل ثمرها