ماجد العضياني
مرحبا بسم الشيوخ اهل الشجاعة والحمية=
الزحول من الرجال الا طحاطيح الرجالي
اسم فيصل فالدفاتر بالحروف الابجدية=
فالدفاتر قبل اشوفه بالعمامه والعقالي

فيصل الرياحي:
البقاء لعتيبة الهيلا و الك مني تحية=
جيت اشارك ثم ابارك مع مطانيخ العيالي
لا لقيت اسمي ترا اسمي ماتحمله المطية=
مار ياماجد تجمعنا ولمتنا الليالي

ماجد العضياني
السحابة فالسماء واظن ماطرها بردية=
والرعود تحن والبراق في مزن الخيالي
والله انا يالرياحي ماندور للردية=
انتحرى الطيبة في سوقها لو كان غالي

فيصل الرياحي
السحابة لا تغيرها الرياح الموسمية=
جعلها تسق الجنوب وجعلها تسق الشمالي
انت ياماجد مزوح وشايفك تمزح علية=
مازح امطير اوعتيبة لاتمازحني لحالي

ماجد العضياني
انت عية مار ابا اقف لك ولو مانيب عية=
فالسهل والا يابن منصور في روس الجبالي
ان شعمت النار تلقى نارنا بالعز حية=
وان بغيت الكيف عان الكيف في صفر الدلالي

فيصل الرياحي
انت لهالحين في خارج نطاق الجاذبية=
لاتحط الحلو مر ولا تحط المر حالي
ما ابغي الا اطلعك فالمملكة والفيصلية=
يالعتيبي مابغا اعدك غير واحد من عيالي

ماجد العضياني
فالبنوك الداخلية والبنوك الخارجية=
للجنيه اصرف جنيه وللريال اصرف ريالي
لا نبي ولا انته بنايف وزير الداخلية=
ولا انت ابن غانم ذياب ولا انت ابو زيد الهلالي

فيصل الرياحي
صاحبي ياللي تعامل فالبنوك العالمية=
طيب الذمة يفكر فالحرام وفالحلالي
كل عام فيه عيد وكل عيد له ضحيه=
ياوزير الداخلية قول ماجد مايقالي

ماجد العضياني
فالبشر نفس فقيرة فالبشر نفس غنية=
واحمد الله يالرياحي مكسبي من راس مالي
موت قيس ابن الملوح حب ليلى العامرية=
بس ويش اتقول لن سار الرشا فوق المحالي

فيصل الرياحي
صاحبي ياللي تغني باللحون السامرية=
شد حيلك لين ترضي حضرت اصحاب المعالي