يا ستاذ والله ماافهم الدرس ياستاذ = والشرح والله ما دخل مخ راسي
دراستي بس اتجلوز تجلواز = ألى زهقت من العمل والجلاسي
الراس رايحة تفاكيره أمياز = محتار مدري وش بلاه الأساسي
ومادام بالي مشتغل كيف أبي امتاز = والجو ماني في هواه أمتواسي
تشرح وانا قلبي عليه الطنى حاز = ماعندك من الجسم غير اللباسي
كنك بتركيا وأنا يم الاهواز = مأسمع صريخ مدويات الحساسي
ما خبلك يا عاذلاً قلبي بعد جاز = تتعب عليه اليوم والصبح ناسي
قلبي رمز وهتز ما عاد يعتاز = ماهو معك لو تربطه بالكراسي
يا ستاذ يبغاله ثمانين حجاز = بعد الفهم صار أبكمن قرطماسي
يلف بي كني على عود جنباز = ومما يلف القلب واراس رأسي
يبي ينوز وينمزر ثم ينماز = ينماز من بين الضلوع القواسي
كنه معه له جن هماز لماز = من الجنون المارجات النجاسي
ألدرس عجزت افهمه يابو فواز = وخسرت بالتعليم عــــامــاً دراسي
قلبي محب وحملة الحب ما تراز = وأنته تعرف الحب وش لون قاسي
ليه حبيباً جزت له عقب ما جاز = وهوه سبب بلواي واصل العكاسي
أيضاً ولي با لبادية سحر وأحراز = وليه من الحضر المقيمين ناسي
وهذا سببنا يوم مانسمع العاز = وهذا عماء فكري وهذا عماسي
وش لون أنا ابي أدرس واركز تركاز = وهية لها بين الضلوع التماسي
ألى علقت ما همني فاز مافاز = وألى هدت عني تجدد حماسي
يا ستاذ واهمي عطا قلبي القاز = وهزهز كراسي القلب والقلب راسي
دعني على كيفي وقل طالبي باز = والأ أن سترت الحال ما فيه باسي
لاتلز من لزه من الوقت لزاز = والحر يفهم والمعلم ســــــياســــــــي