يا متلف الروح روحي منك تلفانه = دقق بحالي وشفني كيف من دونك

إن غبت ما للغلا في ناظري خانه = وان جيت ضيف الضلوع اللي يعزونك

وعروق قلبي على شوفتك ظميانه = متى على الله تجي وتقول وشلونك

مشاعر الود لا من جيت طربانه = لو تطلب المستحيل ان كان يعطونك

اصبّر النفس والاشواق هيمانه = والله يحفظك عن الحساد ويصونك

بركان حبك وزلزاله ونيرانه = ثارت بقلبي ونادى القلب يا عونك

فيك البيوت الوفيّه دوم مليانه = ولعيونك الود يالمجمول يهدونك

الشعر كله لعينك وانت من شانه = عشقت بحر القصيد وغنت لحونك

ارخ النواعس وهاك القلب بعنانه = اموت بك لا حضنت القلب بجفونك

غارات حبك وركبانه وفرسانه = صالت وجالت وسيفي صار من دونك

مكفاك تطعن بروحٍ منك تعبانه = ان كان يرضيك موتي كثر طعونك

وش في عيونك تسج ودوم نعسانه = ما ترحم اللي شراك وصار مفتونك

لا يهمك الود حتى الود وان كانه = يلهيك عني وعن قلبي على هونك

ومدام شعري لعينك وانت من شانه = كلّي حلالك وكلي فدوة عيونك