عبد العزيز أهلاً وسهلاً وترحيب=بقدومك اللي جاء بوقته وحينه

هلا عدد مايطلع البدر ويغيب =وعداد ماهل المطر من غشينه

بالورد بالريحان بالعطر بالطيب=عنّا وعن ساير قبايل جهينه

بالحب والتقدير وبكل تأديب=يامرحبا واليوم فرصه ثمينه

ياسيدي مانقول حنّا المعازيب=أنت المعزب وأنت نور المدينه

في ظل أبو متعب عطيب المضاريب=رفرف علمنا وابحري ياسفينه

يقودها والموج حوله عباعيب=ماهز راسه والعجم له رطينه

حراً ليامنه صفق بالمخاليب=حل العقود وعقدها في يمينه

بالراي بالحكمه بكل الاساليب=حتى العدو يشهد بما تشوف عينه

بالعدل مايرقاله الشك والريب=عم الوطن بالعدل ومواطنينه

بارجاء الوطن قامت عماير مكاهيب =وتبدلت عقب الصحاري جنينه

ياسيدي نطلبك عدة مطاليب =مطلب ضروري للبلد طالبينه

ياكبر املنا والأمل فيك مايخيب =نرجي طلبنا من يديك الأمينه

الماء نجيبه من ردي المشاريب=ملح وشحيح وليتنا واجدينه

والناس تشرب تحليه بالانابيب=لكن المربع صابر الله يعينه

ومصروف طالبنا يسلم من الجيب=والطالب الثاني وجد من يعينه

وحتى اللاسلكي لاينادي ولا يجيب =والفاكس والجوال ماله كبينه

وبث البرامج لانعرفه ولا جيب =واسم المربع ماهم مبرمجينه

اليا اقبلوا يلقون عنّا مجانيب=وليا أدبروا راحت علينا غبينه

واسلم ويحفظك الولي عالم الغيب=وصلّوا على اللي تم شرعه ودينه