رميت القلم والحبر والطرس والممحـاه =وبحرق جميع اللـي كتبـت بدواوينـي

وبثني القدم عن كل رجمٍ نويـت أرقـاه =عن الهجس عندي مـا يكفـي ويغنينـي

ويارب لك عبدٍ ركع ثـم قنـت بدعـاه= دخيلك من همومٍ كلت وشربـت فينـي

الى جيت أبدله عن ثقيل العنـا وانسـاه = طرى ما طرى واطرقت فكري لداعيني

جزا الله مشحونٍ جذبني بصوت اغنـاه = شعى القلب بالمنكوس والناس ممسينـي

يشادي لذيبٍ في الطويله جـذب بعـواه= الى اوحيت حسه تالي الليـل يقزينـي

عن النوم. يا نومي انا ويـن انـا ويـاه = وكاد الذي واطيه مـن شيـن واطينـي

صحيح الهوى يرّث على الرجل ما يشناه =صدوق الهوى يصبر على المر والشيني

الى من ذكرت اللي وصوفه عجـب لله = عجب يا عجب كلش من الترف مغريني

تململت كالمعلـول مـا عينـوا لـدواه = ولاذقت مايحمـل سـوى مـا يقسّينـي

انا ما هبلني كون دلـه وزيـن احكـاه = الى اقبلت هلاّبي والى اقفيـت يدعينـي

ولا من دعيته ما نزرني بقولـة هـاه!! = ولااسمع سوى لبيه.وابشر.ومن عينـي

على القلب يـا خفـه وياثقـل ماسـواه = يفيض الزعل لا قـام بالشـك يوذينـي

على الهون ياللي تطري البعد وش طراه = ترى الشك مايصلح يجي بينـك وبينـي

انا حالفٍ ما اجفاك يا ضامـر المثنـاه = ولااجفى سوى الظفران تجفى المياديني

ولاانسى سوى تستنكر المجهـم الـدوّاه = من اللي رعاها خمس عقـب الثلاثينـي

فلاني من اللي يجعل العلـم بـه هنّـاه = ولا الله على البهتان والكـذب حادينـي

علشان حبه والغـلا والزعـل ورضـاه = نسيت الذي قد كان من سالـف سنينـي

وبرمي القلم والحبر والطرس والممحاه = وبحرق جميع اللي كِتب فـي دواوينـي