يقول عيد العرفي العز بالقرش=نعمه ونقمه من وجدها قرشها

ويقول عيد العرفي انما ارتشيت ارش=غشك لقوم يقوم عنك بغششها

ويقول عيد اللقمه تبرّك الهرش=وتقوّم اللي بالنعش من نعشها

الطيب والمعروف بالناس مثمرش=تبقى العيون العمش عمش بعمشها

ياعنتر افهم غايتي لاتعنترش=خل الطيور معششه في عششها

صرّ القروش البيض لايامك الخرش=تغنيك عن مال الدفوش ودبشّها

القرش يرفع قيمة العمي والطرش=وليا انعدم تبقى السموع بطرشها

وانما جنيت الورش من منبت الورش=بلشات غيرك لاتطيح أبلشها

لولا القروش الناس ماتعمل الشِرش=هو وشهو اللي غيرها ألذ واشها

شيطانها لابيض والاسود والاحمرش=قدّام لايرمش بعينه رمشها

القرش خلا صاحب العقل ينخرش=سيطر على كل العقول وخرشها

الناس لاجله كنها سباع تجترش=كلن ليا حصل فريسه نهشها

مابين حرم وحِل ومحايل ومرش=فتنه على اصحاب الورش في ورشها

القرش طوّر عالم سموعها فرش=وانبت على أم الصوف صوف ونفشها

لكن الفقير يعيش والكرش بالكرش=ويموت كبده يابسه في عطشها

كنزه يديه البيض وكفوفه الحرش=وخذها وعطها في كفوفه نقشها

اليا عطا كنه يغرش البحر غرش=وليا طفش عاش الحياة بطفشها

ان غاب ينسى ون حضر مايعبرش=غير السما فوقه والارض افترشها

عايش كذا رزقه على رافع العرش=اللي كفل رزق انسها مع وحشها